Telepostip Elite Sport Greenlandillu aningaasaliinermut isumaqatigiissutertik sivitsorpaat
Telepostip Elite Sport Greenlandillu aningaasaliinermik isumaqatigiissutertik sivitsorpaat.
Elite Sport Greenland tusagassiuutinut nalunaarummi taama allappoq.
Suleqatigiinneq pitsaanerusumik sulinissamut periarfissiimmat, Telepostimik suleqateqarneq pingaaruteqartoq, Elite Sport Greenlandip siulittaasuata tullia, Inooraq Brandt, oqarpoq.
- Suleqatigiinnitsigut piginnaasaqarluartunut amerlanerusunut, ukiuni tulliuttuni piorsagassatsinnut, anngussinnaalersarpugut, Inooraq Brandt oqarpoq.
Timersornermik piginnaasallit sungiusartarnerminni aamma inuttut ineriartortartut, Telepostimi ineriartortitsinermut pisortaq, John Eyðstein Johannesen, isumaqarpoq.
- Sungiusarnissamut pilersaarusiorneq, sammisassanik aaqqissuussineq klubbinilu ataatsimoorfiusunut peqataaneq ilikkartarpaat. Piginnaasat taakku inuiaqatigiinnut iluaqutaalerumaarput, John Eyðstein Johannesen oqarpoq.
Elite Sport Greenlandip aamma Grønlandsbankimik suleqatigiinnermik isumaqatigiissutaa jannuaarimi sivitsorneqarpoq.