TelePost sinneqartoorpoq
Ataatsimeersuarnermi tassani siulersuisut siulittaasuata Agner N. Markip, 2010-mut naatsorsuutinut tunngatillugu siusinnerusukkut naammaginartutut nalunaarutigisamini, 69,5 millionit koruuninik sinneqartoornertik eqqaareerpaa. Aamma oqaatigalugu ukiup siulianut naleqqiullugu naatsorsuutitik 6 millionit koruuningajannik pitsanngoriaateqartut.
Taamaalilluni Nunatta karsiata sinneqartooruteqareersup 32 millionit koruuninik pissarsinissani naatsorsuutigisinnaavaa.
Soorlu siulersuisuni siulittaasup naatsorsuutinut tunngatillugu nalunaarummini oqaatigeriigaatut, Tele piffissami matumani ineriartorluarpoq, internetimik annertusaaneq akisooq aningaasaliiffigisinnaallugu, tamatumalu peqatigisaanik atuisut pitsaassutsimik suli pitsaanerusumik atuisinnaatillugit, imartussutsimik annerusumik akinillu appasinnerusunik atugassaqartillugit.
Niuernermik ingerlatsivik Tele, suliffeqarfissuup naatsorsuutaanik kaaviiaartitaanillu kivitsisuuvoq. Sinneqartoorutinit 69,5 millionit koruuniusunit suliffeqarfiup attaveqaqatigiinnermik sullissineranit isertinneqartut 58,6 millionit koruuniupput. Kaaviiaartitat siorna 680 millionit koruuniupput.
Niuernermik ingerlatsiviup Postip sinneqartoorutai 9,3 millionit koruuniupput, ukiup siuliani 7,9 millionit koruuniullutik. Taamatut angusaqartoqarpoq, naak sakkortuumik unammillertoqaraluartoq aamma allakkat poortukkallu nassiunneqartartut ikiliartoraluartut.
