Telepost Greenlandimiit soraarsitaapput
Angutit inuusuttut 23-nik 24-nillu ukiullit Telepost Greenlandimit atorfimminnit soraarsitaapput, paasineqarmat, allakkerivimmi atorfeqarnertik iluaqutsiullugu ikiaroornartunik eqqussuisarsimasut.
Paasineqartunut aamma ilaavoq ikiaroornartunik eqqussuinermi aningaasaliisarsimasoq, angut 25-nik ukiulik. Tamakku atuarneqarsinnaapput aviisip Sermitsiap nittartagaani: Sermitsiaq naggat gl-imi.
Politiit ikiaroornartunik nakkutilliisuisa pisortaata, Finn Jeppesenip, oqaluttuaraa, poortukkat allakkerivikkoorlugit boksinut agguaatinnginnerini, angutit tigusarineqartut allakkerivinni sulisut tigusarisimagaat.
Ilanngaaserisut paasisimavaat poortukkat ilaat ikiaroornartumik imaqartoq; kimut ingerlasuunersoq paasiniarlugu uninngatiinnarsimavaat, tassalu paasivaat allakkerisarfimmi sulisunukartuusoq.
23-nik ukiulik qaammatini arfineq pingasuni, 24-nillu ukiulik qaammatini qulini isertitsivimmiittussanngorlugit eqqartuunneqarput; aningaasaliisuusimasorlu qaammatini arfinilinni isertitsivimmiittussanngortinneqarpoq, tuniniaasarnerminilu iluanaarutaanik, 270.000 koruuninik, arsaarneqarluni.
