Telep internetimut akigititai apeqquserneqaqqipput

Kalaallit Nunaata, Savalimmiut aamma Islandip akornanni alimasissumit atuartitsineq isumassarsiatsialaagaluartoq, tamatumunnga Telep internetimut akigitai akornusiisinnaapput.
Allattoq Elisa Isaksen
oktobarip 25-at 2010 09:53

Taama oqarput Inatsisartuni Kulturimut, Ilinniartitaanermut Ilisimatusarnermullu ataatsimiititaliami ilaasortat, siunnersuutip Josef Motzfeldtimit Nunat Avannarliit Killiit Siunnersuisoqatigiiffianni aallartitat siulittaasuattut saqqummiunneqartoq aqagu Inatsisartuni oqaluuserineqannginnerani.

Siunnersuummi matumani Nunatsinni, Savalimmiuni Islandimilu naalakkersuisut suliniummik nutaamik aallartitsinissaannik kajumissaarneqarput, siullertut Kalaallit Nunaanni aamma Savalimmiuni ilinniartitsisut qarasaasiakkut Islandip universitetiani 'Institut for Uddannelse'-mi ilinniaqqinnissaannut peqataanissamut suliniuteqaqqullugit.

- Kalaallit Nunaanni innuttaasut amerlassusiannut sanilliullugu nunatta isorartunera klassimi ingerlatsilluni nalinginnaasumik ilinniartitsinissamut toqqaannanngikkaluamik aporfissiisinnaammat IT-mi teknologiip ineriartornerata atorluarsinnaanera assut pingaaruteqarpoq. Ungasianit atuartitsineq aqqutigalugu amerlanerit piginnaasaminnik inerisaanissaat ilinniarnermilluunniit naammassinninnissaat periarfissineqassaaq. Ataatsimiititaliami siulittaasoq Harald Bianco, IA, siuttoralugu isumaliutissiissumminni taama allapput.

Siunnersuut Inatsisartuni siullermeerneqarmat taperserneqarluarpoq, ataatsimiititaliallu tapersiineq ilalerpaa, Tele-lli internetimut akigititai apeqquserlugit, taakkumi qarasaasiaq atorlugu alimasissumit ilinniartitsinermik periarfissanik akornusiisinnaammata, ilinniartumut ataatsimut akisuallaalernissaa pissutigalugu.