Telep internet mobilillu isaatitsissutigai
Attaveqaqatigiinnermut suliffeqarfik, Namminersorlutik Oqartussanit pigineqartoq, septembarip naanerani 92 millionit koruuninik sinneqartoorpoq, taakkulu siorna taamaalineranut sanilliullugit 50 procentit missaannik amerleriaateqarput. Siornami taamaalinerani sinneqartoorutit 60 millionit koruunit missiliorpaat.
Oqarasuaatinik angallattakkanik internetimik atuinerulerneq pissutaasoq, suliffeqarfiup naatsorsuutitigut angusarissaarnerminut nassuiaatigaa.
Taamaattumik tamanna pissutigalugu tamakkunuunatigut kiffartuussinermi akigitinneqartut oktobarip ulluisa aallaqqaataanniit affaannanngortinneqartut oqaatigineqarpoq.
Allakkeriveqarfimmi aamma ingerlalluartoqartoq nalunaarutigineqarpoq, sinneqartoorfiusoq oqaatigineqarami, naak allakkeriveqarfiit allat sinneqartoornissaminnik ilungersuuteqaraluaqisut.
- TelePostip siuarsartuarnissaanut pitsaasumik aningaasaqarneq aalajangiisuulluinnartuuvoq, taamaalillutami inuiaqatigiit akinik appaaffigiuarnissaannut, annerusumillu piginnaasaqalernissatsinnut, aningaasaliisinnaanissamut qulakkeernittuummata, pisortaanerugallartoq, Steen Montgomery Andersen, oqarpoq.
Taassuma erseqqissaatigaa, akinik apparsaanissamik Nalunaarasuartaateqarnermut aqutsisoqarfimmit akuerineqarnissap utaqqinerata sivisusarnera pissutigalugu sinneqartoorutit naatsorsuutigisamit amerlanerusut.
Ataatsimut isigalugu TelePostip ukiormanna, akileraarutit suli ilanngaatiginagit, sinneqartoorutissai 100 millionit koruunit missaanniinnissaat naatsorsuutigineqarpoq. Taakku siorna sinneqartoorutinut 71 millionit koruuniusunut sanilliunneqarsinnaapput.
