Telep illorsuassaa naammassingajalerpoq
Nalunaarasuartaaseriviup Tele Greenlandip Nuup qeqqani illorsualiaa pilersaarutit malillugit naammassingajalerpoq.
Illorsuarmullu nuuttussat arlaqalereerput.
Aningaaserivik Sparbank Vest marsip 14-niani nuussaaq, taava Atuagalliutit kiisalu allakkerivik tulliullutik nuussasut, siunnersorti Magnus Agerskov oqarpoq.
Illorsuup 70 procentia attartorneqareerpoq, pisiniarfiit marluk, inissiaq ataaseq, etasiarlu ataaseq allaffittut attartorneqarpoq. Isumaqatigiissutissarlu kingulliugallartoq suli naammassineqanngilaq.
Suli attartorneqanngillat ini pisiniarfiusinnaasoq, allaffeqarfiusinnaasoq inissiarlu ataaseq.
Inissiaq ataaseq illorsuarmi qullerpaamiittoq isikkivigeqisorlu suli pisiariumaneqanngikkuni attartorumaneqanngilaq.
Magnus Agerskovilli ilimagaa kingusinnerusukkut inniminniisoqassasoq, ilami isikkiviginnera iluatigineqanngitsoornavianngimmat.
Inissiatut atorneqarsinnaasut qulingiluat suli pisiarineqarsinnaapput, inissiarlu ataaseq 2 - 3,4 milliuuni koruunit akornanni akilerlugit pisiarineqarsinnaagamik. Inissiarlu qullerpaaq 180 kvadratmeterinik annertussusilik 4,6 milliuuni koruuninik akeqarpoq.
Telep illorsualiortitaa 127 milliuuni koruuninik naleqarpoq, aningaasalersorneralu sanaatortartoqatigiinnit isumagineqarpoq, Telelu qanoq akiliitigisimanersoq oqaatigineqarumanngilaq. Tele Greenland sanaartortitsisuugaluarluni attartortitsineq inissianilluunniit tuniniaaneq kisimi akisussaaffiginngilaa.
