Qulaarpaa Telemik ilisimasallip namminersortunngorsaaniarneq “silaqanngitsuliornerunerarpaa”

TELE-p namminersortunngorsarneqarnissaanik isuma qimanneqarli. Taama isumaqrpoq attaveqaatit pillugit nalilersuisartoq, oqarluni TELE namminersortunngortinneqarsappat tamanna inuiaqatigiinnut ungasinnerusoq isigalugu akisuupilussuusinnaasoq.

Nunarsuatsinni naalagaaffini attaveqaatit pillugit nalilersuisartup, Jan Strandip Nunatsinni attaveqaatit namminersortunngorsarneqarnissaannut paasissutissat atuareerlugit, taanna oqarpoq aatsaat taama pilersaarutinik torinngitsigisunik takusaqarluni.

- Attaveqaatit pillugit ukiuni 20-ni sulininni aatsaat taama torinngitsigisunik naammattorsivunga.

Jan Strand oqarpoq naqissuserlugulu, attaveqaatit pillugit unammilleqatigiinneq illersorlugu akuerisuugamiuk. Kalaallit Nunanninili taama inukitsigisumi attaveqaatinillu atuinikiffiutigisumik tamanna imminut akilersinnaanngitsoq oqaatigalugu.

Jan Strandip aamma oqaatigaa, Kalaallit Nunaanni attaveqaatit namminersortunngortinneqassappata tamanna imminut akilersinnaassanngitsoq.

- Attaveqaatit ilaat namminersortunit akisussaaffigineqalernerani, Kalaallit Nunaanni innuuttaasut isumaqassapput tassa maanna unammilleqatigiittoqalersoq. Takusinnaanngilarali nammisortut qanoq ilornikkut attaveqaatinik pitsanngorsaanissaat aamma qanoq iliornikkut tamassuma akikinnerulernissaanik angusaqarnissaat, tassami Kalaallit Nunaanni atuisut akikinnerusumik pitsaanersunillu ujartuipput, Jan Strand oqarpoq.

Tamannarpiarlu pillugu taanna politikerinut ima siunnersuuteqarluni.

- Namminersortunngorsaanermik isuma maanna qimanneqarallassasoq isumaqarpunga. Tassami nammisortunngorsaaneq siunertaralugu suliani maannamut takuneqarsinnaasuni allassimanngilaq, unammilleqatigiinnerup nalilersorneqarnera naak maannamut Kalaallit Nunaanni unammilleqatigiittoqareeraluartoq, Jan Strand oqarpoq.

Taanna unammilleqatigiinnermik oqarami ilaatigut eqqarsaatigai soorlu qarasaasiat atorlugit sianertarnerit Skype-kkoortut, taammaaliornemilu TELE-p tamanna iluanaarutigineq ajoraa oqarluni.

Jan Strandip aamma erseqqissarpaa, immap naqqatigut kaapilit atorlugit attaveqaat taamatullu radiokædep iluanaarutigineqarnissaa siunertaralugu aningaasaliisoqarluni tamassuma iluanaarutigineqarsinnaanera, namminersortunngorssanermi eqqarsaatigineqarsimanngimmat. Tamannalu ilaatigut pissutigalugu namminersortunngorssaaneq inuinnarnut atuisunut iluaqutaanavianngitsoq oqarluni.

- Namminersortunngorsaaneq politikerinit suliakkiutigineqarpat iluanaartussat tassatuaapput namminersortunngorsaanermut atatillugu siunnersortit.

Attaveqaatit pillugit nalilersuisartoq, Jan Strand taama oqarpoq.

KNR-TV-kkut sapaatip akunnerani uani aallakaatinneqartussami, Qulaarpaami attaveqaatit namminersortunngorsarneqarnissaannut isuma sammineqassaaq.

Isummersuutit


 

Pages