Telemi sulisut 20-nik ikilivaat

Sulisut 20-t angullugit amerlassusillit, Telemit ukiup aallartinneranit maannamut soraarput.
Allattoq Najaaraq Egede
maajip 31-at 2011 11:02

Soraarsitsineq ilaatigut ingerlatseqatigiiffiup Namminersorlutik Oqartussanit pigineqartup, internetimut akinik appaanerata kingornagut, aningaasatigut ilungersunarsorsiulernermik pissuteqarpoq. Telemi attaveqarnermut pisortaq Sæunn Nolsøe Radioavisimut oqarpoq.

Atorfiit 20-t tassaapput, ilinniarsimanngitsutut sulisunit pisortatut atorfiit, ilaatigut ulluinnarni ingerlatsinerup pisariillisarneranik, nalinginnaasumillu soraartussanngortut suliunnaarnerisigut inuttaaruttut. Atorfiit inuttaaruttut soraarsitsinertut taaneqarsinnaannginnerarpaat.

Peqatigitillugu Telemi ingerlatsineq tamarmiusoq nalilersorneqarsimavoq, sipaarfiusinnaasullu tamaasa - aamma atorfinnut tunngasut - nassaariniarneqarsimallutik.

Telemit Sæunn Nolsøe-p ilanngullugu ilisimatitsissutigaa, Telep ukioq manna  ukiumoortumik naatsorsuutitigut siornatut angusarissaarnissaa ilimananngitsoq, maannangaaq oqaatigineqarsinnaalereersoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq