Telemedicin aallartisarneqalerpoq
Nunatsinni Savalimmiuni Bornholmimilu qaammataasakkut attaveqaat iluaqutigalugu ungasissumiit nakorsiartitsisarneq Telemedicini Danmarkimi Rigshospitalip misiliutigalugu aallartisarpaa.
Tamanna pisinnaanngorpoq taama nakorsiartitsisarsinnaanissamut atatillugu aningaasaliissutissanik qinnuteqaat 775.000 koruuninik aningaasartaqartoq Peqqinnissamik Aqutsisoqarfimmit akuersissutigineqarmat.
Nunatsinni, Savalimmiuni imaluunniit Bornholmimi nakorsiartut Rigshospitalimut aallartinngikkaluarlugit Telemedicina atorlugu Rigshospitalimiit toqqaannartumik nakorsiartitsisoqarsinnaalissaaq, taamaalillunilu aallartitsisarnermi aningaasartuuterpassuit annikillisarneqarsinnaalissapput.
Telemedicina atorlugu nakorsiartitsisarnissaq nakorsiartunut aalajangersimassuinnarnut atorneqartassaaq, soorlu Savalimmiuni nukillunnermik nappaateqartunik nakkutilliinermut Bornholmimi kræftimik nappaateqartut ilaannik nakkutilliinermut atorneqassasoq nutaarsiassaqartitsivimmi ritzaumi allaaserineqarpoq.
Nunatta Danmakillu akornanni Telemedicinep qanoq atorneqarsinnaanera pillugu oqaloqatigiinnerit ingerlanneqareersut, Maybritt Andersen, Dronning Ingridip Napparsimmavissuani peqqissaasut pisortaat oqarpoq, erseqqissaatigaali Telemedicinip nunatta Danmarkillu akornanni qanoq atorneqarnissaa qanorlu ingerlatsisoqarnissaa pillugu Dronning Ingridip Napparsimmavissuata Rigshospitalillu akornanni isumaqatigiissuteqaqqaartoqartariaqassasoq.
