Tele suliffeqarfik TDC assuaraa

Tele A/S-ip pisortaasa Danmarkimi suliffeqarfik TDC assuaraa Danmarkimiit nunatsinnut sianernermik akitsorsaasuunerarlugu.

-Suna pillugu minuttimut syv kruunimik akiliisissavaatigut namminneq to kruuniiginnartarunik, Tele A/S-imi pisortap tullersortaa Erik Halager aperivoq. Taassuma oqaluttuaraa suliffeqarfik TDC arlaleriaqalutik naammagittaalliorfigigaluarlugu akineq ajortut.

Erik Halager oqarpoq TDC arlaleriarlutik isumaqatiginninniarfigitillugu qaffasippallaamik akeqartitsineq uparuartarsimagaluarlugu, kinguneqanngitsumilli.

Danmarkimi pissutsit naapertorlugit telefonikkut attaveqaatinik kikkulluunniit tuniniaasinnaapput. Nunatsinnut sianertoqarpat satellitti iluaqutsiullugu attaveqaatit sianerfissanut apuunneqartarput taamatullu kiffartuussineq Telep taamaallaat to kruuninik pissarsissutigisarpaa. Imaluunniit nalunaaquttap akunneranut 120 kruunit missinginik.

Sianernermi akiviusup annerussutaa minuttimut fire kroner femoghalvfjerds øriusoq tassaavoq TDC-p nammineq iluanaarutigisartagaa. Imaluunniit nalunaaquttap akunneranut 285 kruunit missingi.

Pissutsit taamaannerat pissutigalugu tupinnanngitsumik inuit oqarasuaatikkut attaveqaatinik kiffartuussisartut akikinnerusut ujartarpaat.

TDC aqqutigalugu Danmarkimiit nunatsinnut oqarasuaatikkut kiffartuussinerit tassaapput kiffartuussinerit tamakkiisut halvfjerds procentii. Suliffeqarfillu angisuujummat siornatigullu kisermaassisuunikuulluni Tele A/S-imit unammillerneqarsinnaanera inornarpoq.

Tele A/S-imi pisortap tullia Erik Halager oqarpoq ukiut marlussuit matuma siornatigut oqarasuaatitigut kiffartuussiveeraq Supertel unammilleqatigiinnermut ilanngussimasoq, minuttimut 2 kruuner 50 ørenik akeqartitsilluni.

Suliffeqarfiup taassuma ukiup affaata ingerlanerinnaani atuisut 1000-it missinginiittut tiguarpai.