Tele-Postip nalunaarasuartaateqarnermik nutarterinissaq 2016-imi pilersaarutigaa

Pingaartumik Kalaallit Nunaata kitaata avannaani nalunaarasuartaateqarnermik annertoqisumik nutarterinissaq misissueqqissaarfigalugulu pilersaarusiorfigineqarpoq.

Ilaatigut  Imaatigut kabelip avannaanut tallinera Maniitsumi, Sisimiuni aammalu Aasianni nunniguffilerlugu. Aammattaaq Aasianniit Qasigiannguit aqqusaarlugit Ilulissanut sakkortusaaviup aqqutaa sukkasooq pilersinniarneqarpoq, kiisalu Uummannamiit Upernavimmut sakkortusaavimmik talliliisoqarniluni.

Sakkortusaaviup aqqutaata sukkasuup atulerneratigut, illoqarfinni imaatigut kabeleqarfiusuni internettersinnaanerup assigisaanik piginnaasaqarlunilu sukkassuseqalissaaq.
 
Innuttaasut imaatigut kabelikkut pilersorneqartut 35 %-it missaannit 66 %-it missaannut amerlineqassapput. Tassalu marloriaatingaajaanik amerlineqassallutik.
 
Internetteqarnerup iluani pitsaassutsimik periarfissanillu oqaluttuarisaanermi aatsaat taama annertutigisumik annertusaasoqassasoq, Tele-Post allappoq.

Kitaata avannaani suliassamik ingerlatsinissaq 300 milllionit koruuninik naleqartussaassaaq, pilersaarullu taarsigassarsinikkut aningaasalersorneqassalluni.

Ingerlatseqatigiiffiup aningaasaqarneranik naliliineq tunngavigalugu tamanna ingerlatseqatigiiffimmut artukkiissaaq, peqatigisaanilli aamma Tele-Postip inuiaqatigiit kalaallit sapinngisamik tamaasa nalunaarasuartaateqarnermik pisariaqartinneqartumik pilersornissaannik kissaateqarneranut naapertuulluni.

Taamaalilluni Kitaata avannaani suliassaq ajunngitsumik ingerlariarpat ukiumi sanaartorfiusumi 2016-imi ingerlanneqarsinnaassaaq.