Tele-Postip angusai aalaakkaasut
Tele-Post, maajip ulluisa 18-ianni ataatsimeersuarpoq, siornalu angusarineqartut akileraarutit piinnginnerini 75 millionit koruuniusut nalunaarutigineqarpoq.
Aningaasatigut angusat siorna 2015-imi aalaakkaasimapput, suliffeqarfimmili ineriartorneq uninngasutut nalilerneqanngilaq, soorlu assersuutigalugu Tele-Postip atuisunut mobilit atorlugit interneteqarneq pitsanngorsarneqarluni. Mobili atorlugu interneteqarneq sukkanerulersinneqarpoq, akillu appartinneqarlutik, mobilisinermilu datat ilaareertartut marloriaatinngortinneqarlutik. Tamanna ilaatigut pissutaalluni mobilit atorlugit internetimik atuineq 112 procentinik qaffariaateqartoq nalunaarutigineqarpoq:
- 2015-imi mobileqarnerup atuisutsinnut naleqassusaanut sammisunik immikkut iliuuseqartarsimavugut. Tamatumalu sulisutta pikkorissut iluatsissimagaat kisitsisit takutippaat, Stine Bosse, Tele-Postimi siulersuisunut siulittaasoq, oqarpoq.
Aningaasat Tele-Postip siorna kaaviiaartitai katillutik 843,4 millionit koruuniupput, ukiup siulianut, 2014-imut, naleqqiullugit 50 millionit koruuninik amerlanerullutik. Aningaasartuutilli piffissami pineqartumi qaffassimapput, 2014-imi 728,3 millioniusimariarlutik siorna 2015-imi 779,7 millioninngorsimallutik.
Atuisunullu aqutsinermut atortut nutaat ineriartortitsinermut aningaasartuutit qaffariaateqarnerat ilaatigut pissutaavoq.
Siulersuisut tamarmik ataatsimeersuarnermi qinigaaqqipput, ataatsimillu aamma ilaneqarlutik, tassaappullu:
Stine Bosse, siulittaasoq, ilaasortallu: Ulrik Blidorf, Maliina Abelsen, Kim Søgård Kristensen, Emil Kleemann, Malene Brobergilu nutaatut ilaasortanngorluni.
