Ukiumoortumik naatsorsuutit: Tele-Post 2018-imi angusatigut kinguariaateqarfiusoq

Kaaviiaartitatigut angusatigullu kinguariartoqaraluartoq Tele-Postimi aqutsisoqatigiit siorna angusat naammagisimaarnartutut nalilerpaat. Nalunaarasuartaateqarnikkut ingerlatseqatigiiffik Namminersorlutik Oqartussanit pigineqartoq Tele-Post kaaviiartitamigut angusamigullu siorna kinguariaateqarfiuvoq.
Tele-Post Namminersorlutik Oqartussanut iluanaarutitut 137,6 millionit koruuninik akiliuteqassalluni pilersaarutigaa. Aningaasat taakku ingerlatseqatigiiffiup nammineq aningaasaataanit akilerneqassapput. Nammineq aningaasaatit siorna 1,1 milliard koruuniupput, ukiup siuliani 1,2 milliard koruuniullutik
Allattoq Mathies Hvid Toft
apriilip 30-at 2019 12:10
Nutserisoq Simon Uldum

Siorna kaaviiartinneqartut 29,4 millionit koruuninik ikinnerullutik katillugit 816,7 millionit koruuniupput. Ukiumoortumillu angusat 93,3 millionit koruuniupput, 2017-imi sinneqartoorutit 99,3 millionit koruuniullutik.

Aamma 2018-imi angusat akileraarutit ilanngaatiginagit 138,7 millionit koruuniupput, ukiup siuliani 147,2 millionit koruuniugaluarlutik.

Annertuumik aningaasalersuisoqaraluartoq angusat qaffasissut

Tamanna ilaatigut Tele-Postip 2018-imi 165,7 millionit koruuninik aningaasalersuisimaneranik pissuteqarpoq, taamaakkaluartorlu ukiut kingulliit tallimat ingerlanerini angusat pitsaanerit tulleraat.

Tele-Post 2018-imi assersuutigalugu Upernavimmi aningaasalersuivoq. Illoqarfik radiukkut sakkortusaavimmut nutaamut oktobarimi attavilerneqarpoq, Upernavimmiullu taamaalillutik radiukkut sakkortusaavik immallu naqqatigut kabeli atorlugit internettimut attaveqalerlutik.

Aningaasalersuinerilli taama qaffasitsiginerat Tele-Postip 2018-imi ingerlatseqatigiiffinnut akileraarutinik akiliisussaannginneranik kinguneqarput. Pisortaqatigiit naatsorsuutini ima allapput.

Nunatsinni akileraarutinik A-nik 68,6 millionit koruuninik akiliisoqarsimanera aamma ilisimatitsissutigineqarpoq.

Aammattaaq 2017-imi aningaasalersuinerup marloriaataa sinnerlugu annertunerunera taamanilu angusat 2018-imut naleqqiullugit pitsaanerunerat maluginiagassaavoq.

Ukioq manna kinguariaateqarfiungaatsiarnissaa naatsorsuutigineqartoq

Aappaaguli sinneqartoorutissat malunnaatilimmik ikileriarnissaat pisortaqatigiit naatsorsuutigaat.

Tamannalu pingaartumik immap naqqatigut kabelip Qaqortup avataani Sisimiullu avatanni kittorartoorutigineqarneranik pissuteqarpoq. Iluarsaassinerit 45 aamma 50 millionit koruunit akornanni akeqarnissaat pisortaqatigiit naatsorsuutigaat.

Naatsorsuutini aamma atuarneqarsinnaavoq pisariillisaanermik periusissiamut atatillugu piffissaq tamakkerlugu sulisut 20-t 2018-ip ingerlanerani suliunnaarsimasut. Tele-Postimi sulisut taamaalillutik maanna 407-iupput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq