Tele-Postimi iluanaarutit annikinnerulersimapput

Namminersorlutik oqartussat suliffeqarfiutaata Tele-Post Greenlandip, ukiormanna kvartalit pingajuanni naatsorsuutit saqqummiuppai, iluanaarutit 24 million koruuninik annikinnerulersimallutik, ukioq kingulleq piffissap taamaalinerani 84,4 million koruuniusut maanna 60,5 million koruuniummata.
Allattoq Nauja Møller, Hagen Højer Christensen
decembarip 22-at 2014 13:32

Akinik appaanerujussuaq sinneqartoorutit annikilliartorneranut peqqutaasoq, Pisortaanerugallartup Steen Montgomery-Andersenip oqaatigaa.

 

- Sullittakkat qitiutippavut nioqqutissanut nutaanut, akigititanut appasinnerusunut aamma IT-mut atortunut nutaanut sullittakkanut sammisunut annertuumik aningaasaliinikkut, tassa suliffeqarfik pitsanngorsarniarlugu tamatumunngalu ilutigitillugu sullittakkat pitsaanerusumik sullinniarlugit.

- Tamakku saniatigut annertuumik atuivugut internetip aamma datanik ingerlatsinerup tamanut ammanerulernissaanik piareersaanermut. Tamakku tamarmik soorunami kaaviiaartitsinermut aamma naatsorsuutitigut angusanut pitsaanngitsumik sunniuteqarput, pisortaanerugallartoq tusagassiuutinut allappoq.

 

Qaammatini qulingiluani siullerni isertitatigut  24,4 million koruuninik appariartoqarnerata, oqarasuaatit angallattakkat atornerinut akikillisaaneq, EU-milu roamingimut akigititaasut eqqunneqarnerat peqqutaatinneqarput.

 

Nuummi, Sisimiuni Qaqortumilu septembarip aallaqqaataani oqarasuaatit angallattakkat attaviat 4G atulersinneqarpoq, qaammatillu ataatsip ingerlanerani oqarasuaatitigut atuisut 1000-it atuisuunertik 4G-mut nuussimavaat.

 

Oqarasuaatikkut internetimut attaveqaatinut akinik appaanikkut atuinerit marloriaatinngorput, TelePost allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq