TELE-POST: ”Uagut akiligassarinngilarput”

Ipadit 3.000-it Villumfondenip Qeqqata Kommuniani Kommune Kujallermilu atuartunut tunissutiginiarlugit maajimi aalajangiussai iluatsinngitsoorartarsinnaasut radioaviisimi sapaatit akunnerata siuliani oqaluttuaraarput.
juulip 08-at 2013 11:10

Qeqqatami Kommuniani borgmesterip Hermann Berthelsenip TELE-POST-illu akornanni maanna assortuussutaalerput. Kommunit qarasaasiaaqqanut qanoq aningaasartuuteqartigissanersut assortuussutaavoq.

Danskimmi aningaasaateqarfiata tunissuteqarnermini piumasaqaatigaa, atuartut 3.000-it qarasaasiaaraat mobilt attaveqataasigut internettimut attavilerneqassasut - tassalu atuarfimmiikkaluarunik angerlarsimagaluarunilluunniit internettersinnaassallutik:

- Neriuppunga suliniutip taamaatiinnarneqarnissaa pinngitsoortissinnaassallugu, internettimummi akigitinneqartut - utoqqatserpunga - taama ingasatsigisut pissutigiinnarlugit sapangiinnarutsigumi Nunatsinnut tamarmut annaasaqaataassaaq, Herman Berthelsen oqarpoq.

Sisimiut borgmesteriata internettimut akigitinneqartut taama qaffasitsigitillugit, atuartunut tuusintit sinneqartunut internettimut akiligassaq akilersinnaanngilaa. Internettimik pisartagaq akikinneq atussaguniuk, kommunia 10 millionit pallillugit aningaasartuuteqarnerussaaq.

Borgmesteri aningaasanik immikkoortitsereersimavoq, internettimulli atugassanut taakku naammaqqajanngillat.

- Kommunerisanni ingerlatsinermut allanullu to millioner koruunit immikkoortereerpagut, borgmesteri Siumumeersoq oqarpoq.

Ipadinik suliniummi kommunit peqataasut aappaat, Kommune Kujalleq, 1,5 millioner koruuninik immikkoortitsisimallutik nalunaarput.

TELE-POST-illi akiligassamik akiliiginnarnissaa kommunit naatsorsuutigissanngilaat.

- Suliniutip ilusilersorneqarnera sunniuteqarfiginngilarput, taamaakkaluartoq Villumfondenip piumasaqaatai naammassiniarsaraagut. Sullitatsinnut allanut sunniuteqarnerlunnissaa pinngitsoortinniartariaqarparput, pisortaaneq Michael Binzer oqarpoq

Aningaasaateqarfik kommunillu suliniuteqartuupput, taamaammat aamma akigitinneqartut akilertariaqarpaat, oqarpoq nangillunilu:

- Aaqqissuussinermi matumani ingerlatsinermut aningaasartuutigineqartussat arlaannit matussuserneqarnissaat pisariaqartipparput, Villumfondeniusinnaavoq Ipadinik tunissuteqartuusoq, imaluunniit kommunit tunissutisisuusut. Suliniut maannakkorpiaq allaanngilaq Københavnimi Operartarfissaq, aningaasaateqarfiummi namminersortup illorsuaq tunissutgaa, allallu ingerlatsinissamut akiligassaq akilertussanngorlugu. Uagut (Aaqq., TELE-POST) ingerlatsinermut aningaasartuutissat akilersinnaanngilagut. Kommunit namminneerlutik akilertariaqarpaat, telep pisortaanera nassuiaavoq.