TELE-POST WIFI-mut attaveqaatit iluarsiniarlugit ulapittoqarpoq
TELE-POST-imiit ullup qeqqata missaani nalunaarutigineqarpoq, teknikkikkut ajoquteqartoqarnera pissutigalugu qarasaasianut attaveqaatit ilai suli attaveqanngitsut.
Wifi-mullu attaveqaatit suli attavilerneqarsimanngitsut iluarsiniarlugit maanna ulapittoqartoq.
Tele-Postimi Attaveqaqatigiinnermut pisortaq Julie Rademacher KNR-mut taama allappoq
- Qarasaasianut attaveqaatit ippassarli attaveerummata, WiFI-mut attaveqaatit atuisartunut amerlasuunut ajornartorsiortitsipput.
Tamanna teknikkikkut ajutoornermik patsiseqarpoq, telemiillu nalunaarutigineqartoq naapertorlugu, modeminut attaveqaatit ullaarmanna tamarmik eqqorneqarput.
Attaveqaatinut atortorissaarutit maanna iluarsineqarput, kisianni modemimit Wifi-nut attaveqaataat ingerlaannaq iluarsinavianngitsut, Julie Rademacher taama oqaluttuarpoq
- Ajuusaarpugut atuisartuttalu pakatsinerat paasisinnaalluarpagut, atuisartugullu tamarmik Wifi-mut attaveqalernissaannut ilungersorluta sulivugut. Atuisullu naammagittaqquagut.
TELE-POST-imi IT-mi pisortap Nikolaj Christoffersenip attaveqaatit iluarsiniarnerisa sivisunerat ima nassuiarpaa.
Modeminut tamanut attaveqaat ajortissimavoq.
Taamaattumik Wifinut attaveqaatit attavinitseqqittariaqarsimavagut.
Wifinut attaveqaat attavinitseqqinniarlugu illit qanoq iliuuseqarsinnaanngilatit, systemip tamanna aaqqissavaa, Tele-Postimi IT-mi pisortaq taama oqarpoq, ilanngullugu,
- Wifimut attaveqaatit tamaasa ataatsikkut systemip ajoraluartmik ammarsinnaanngilai
Wifimut attaveqaatit 70 procentii ippassarli attavinipput, maannalu atuisartut 30 procentiisa attavininnissaat pillugut ilungersorluni sulisoqarpoq, taamaalilluta qulakkiissatsigu wifi-mik atuisartugut tamakkerlutik attavininniassammata, Nikolaj Christoffersen taama oqarpoq.
Wifimut attaveqaatit tamarmik attavinippata, TELE-POSTip tamanna nalunaarutiginiarpaa
