- Kalaallit oqaaserput Tusass oqaatigiuminarlunilu eqqaamajuminarpoq, Nunatsinni avataanilu. Oqaaseq tamatta ilisimavarput, maannakkullu imartunerusumik isumaqalissaaq, Tusass-imi allaffissornikkut pisortaq, Kristian Reinert Davidsen, oqarpoq.Assi: KNR

Tele-Post Tusass-imik taaguuteqalissaaq

Nalunaarasuarnermik allakkerisarfinnillu ingerlatsivik Tele-Post Tusass A/S-imik taaguuteqalissaaq. Oqaaseq taanna oqarasuaatikkut kiffartuussivimmi taaguutitut amerlaqisut ilisimareerpaat.

Tele-Post-ip allagartatik ilisarnaatitillu allanngortitertussanngorpaat.

Ullumi pingasunngornermiit Tele-Post tassa Tele-Post-iujunnaassaaq.

Suliffeqarfik taaguuteqalissaaq Tusass.

Oqaaseq taanna amerlaqisut ilisimareerpaat. Oqaaseq taanna ullumi ingerlatsivimmi mobilinik internetikkullu atortussanik isumaginniffiup taaguutigaa. Ukiut 20-t matuma siorna oqarasuaatikkut immersortakkamut taaguutitut atorneqalerpoq.

AAMMA ATUARUK Tele-post ukiuni aggersuni aningaasaleersuarniartoq

Maannakkullu tassa Tusass ingerlatsiviup tamarmi taaguutigilissavaa.

Tusass tusagassiuutinut taamatut nalunaarpoq.

- Kalaallit oqaaserput Tusass oqaatigiuminarlunilu eqqaamajuminarpoq, Nunatsinni avataanilu. Oqaaseq tamatta ilisimavarput, maannakkullu imartunerusumik isumaqalissaaq, Tusass-imi allaffissornikkut pisortaq, Kristian Reinert Davidsen, oqarpoq.

Tele-Post pillugu

 

TELE qallunaat naalagaaffiata ataani sivisuumik inissisimavoq, taamanilu Grønlands Tekniske Organisation-imik taaguuteqarluni. 1994-imi Namminersornerullutik Oqartussat ataanni ingerlatseqatigiiffinngorpoq, taamanilu TELE Greenland A/S-imik taagorneqalerpoq.

 

POST nunat tamalaat allakkerinikkut kattuffissuannut 1938-mi ilannguppoq. Ukiorlu taanna Kalaallit Nunaata taamaammat frimærkii siulliit nunarsuarmi akuerisaasut sanasinnaanngorpai.


TELE assigalugu Grønlands Postvæsen ukiorpassuarni danskit naalagaaffiata ataani ingerlavoq. Allakkeriveqarneq Namminersornerullutik Oqartussanit 1986-imi tiguneqarpoq taagorneqalerlunilu Kalaallit Allakkeriviat. Ullumikkut taaguuteqarpugut POST Greenland.

 

TELE aamma POST 1997-imi ataatsimuulerput, ullumikkullu taaguutigaa TELE-POST.

 

Ullutsinnut naleqqunnerusoq

Ingerlatsiviup oqaatigaa, nutaamik taaguuteqalernikkut aamma nutaamik periusissatut pilersaarut aallatisarneqalersoq.

- Tusass-ip atassuteqaqatigiinneq kiisalu atassuteqarniarnikkut sumiiffitsigullu atuisartunik sullissilluarneq eqqumaffiginerussavarput. Siunissami ingerlaavartumik nioqqutinik pitsanngorsaaneq akinillu apparsaaneq ingerlanneqaannassapput, pisotaq, Kristian Reinert Daviden, oqarpoq.

Tusass-imi siulersuisut siulittaasuat Stine Bosse isumaqarpoq, Tusass taaguutitut ullutsinnut naleqqunnerusoq.

- Tusass-imi sullissivitsinni nalillit nalorninanngillaq, suuneri takujuminarlutillu atuisartunut atoruminarput. Taamatut inissisimaneq maanna suliffeqarfimmut tamarmut aaqqissuutaatilissavarput ulllutsinnullu tulluarnerulersillugu, Stine Bosse oqarpoq.

AAMMA ATUARUK Tele Greenlandip Tunumi internetsip sukkatsinnissaa neriorsuutigigaa

- Tamatuma saniatigut mingutsitsinnginniarneq isumannaallisaanerlu qitiutittariaqarpagut, Tusass-imi aningaasaliisarnitsinni ulluinnarnilumi, silarsuarmiut qanillitinniarneranni – uagullu immitsinnut qanillineruniarnitsinni.

Ingerlatsivik aatsaat nutaamik taaguutitaalinngilaq. Ingerlatsiviup ukiuni 150-it missaanni ingerlanerani Tusass tassaagunarpoq taaguutit 20-ssaat.

Nutaamik taaguutitaarnerup ilisarnaatitaarnerullu kinguneranik, Nunatsinni tamani Tele-Post-ip taaguutaa ilisarnaataalu taarsersorneqassapput.

Tamanna ingerlaavartumik ullumimiit ingerlatissavaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat