Tele-Post tillinniarfigiterujussuartoq
Smartphonesit tillinneqartut meqqi tassaapput Iphonesit Samsungillu, katillugillu 150.000 koruunit missaannik naleqarlutik.
Ilulissani politiit suliaq misissuiffigileruttorpaat, tassungalu atatillugu tillinniarsimasumik, tillitanilluunniit pisisimasumik tigusarinnittoqarsimasoq nalunaarutigineqarpoq, smartphonesilli amerlanersaat suli utertinneqarsimanatik.
Politiit tillinniarneq misissuiffigaat takunnissimasinnaasunillu ujaasillutik. Tele-Postip nalaani sapaammi marsip ulluisa aqqaneq-aappaannit ualikkut nalunaaquttap pingasut missaannit ataasinngornerup ullaakkuata tungaanut pasinarsinnaasumik malussarsimasinnaasut politiinut saaffiginneqquneqarput.
Innuttaasut smartphonesinik nutaanik neqeroorfigineqartut politiinit mianersoqquneqarput, innuttaasut smartphonesinik nutaanik, akikitsunillu neqeroorfigineqartut pisinnginnissaat kajumissaarutigalugu. Pisinermut uppernarsaammik peqarnatik smartphonesimik neqerooruteqartut pisiniarfigineqannginnissaat kaammattuutigineqarpoq.
Smartphonemik tillitamik tigummiaqarluni siumorneqaraanni tillitamik pisisimasutut pasineqarluni pinerluttulerinermi inatsit malillugu unnerluutiginnittoqarsinnaavoq.
Tele-Post Ilulissani tillianniarnermut tunngasumik ilisimasaqaraanni takunnittuusimagaanniluunniit Ilulissani politiit saaffigineqarsinnaapput, Ilulissani politiit oqarasuaataasa normoraat 70 14 22.
