Tele-Post: Telefon, radio tv-lu aaqqeqqittut

Tele-postip Europami pilersuisuinit attaveqaatit ajoquteqaleraluarput.
Tele-postip Europami pilersuisuinit attaveqaatit ajoquteqaleraluarput. Assi © : Simon Uldum / Arkiv
Allattoq Karsten Sommer
aggustip 08-at 2019 10:27

Nunanut allanut attaveqarniarneq ippassaq ajoquteqartoq Tele-Postip nalunaarutigaa. Telefoneqarneq, KNR radio TV, aningaaserivimmut nuussinerit ajoquteqarlutik.

Avammut sianerneq internetilu maanna aaqqinneqareerput. Kujataanili imaani kabelimik iluarsaassineq suliarineqalernera pissutaalluni interneti arriinneruvoq.

- Pilersuisorisatsinnut sakkortuumik oqaatiginikuuarput, TELE-POST Kalaallit Nunaannilu sullissagut attavinnik taakkuninnga pinngitsuuisinnaanngilluinnartut. Attaviit aaqqeqqinneqarnissaat maannakkut ilungersorluta qulakkeerniarsaraarput, TELE-POST-imi Teknikkimut IT-mullu pisortaq Jonas Hasselriis oqarpoq.

Nunarput marlunnik naliginnaasumik attaveqarpoq, Kujataanili imaani kabelimik iluarsaassinerit pissutigalugit attaveqarneq ataasiinnaavoq, taamaattumik Kalaallit Nunaannut attaviit ajoquteqaqqajaasinnaapput attavimmi ataasiinnarmi tassani pilersuisorisami ajoquteqartoqalernerani.