Tele-Post: Nanortalimmi nunaqarfiinilu attaveqaatit tamarmik atassuteqaqqilerput

Nanortalimmiit kujammut attaveqaatit tamarmik atassuteqaqqilersut, TELE-POST-ip nalunaarutigaa.

Nanortalimmi radiokædeqarfiup innaallaagiaarunnera Nanortalimmi nunaqarfiinilu; Tasiusami, Narsaq Kujallermi, Aappilattumi Ikerasassuarmilu attaveqaatit tamarmik pingasunngornermi atassutaarunnerannut pissutaavoq.

- Pingasunngormat ullup qiteqqunnerani atassutaaruttut, ulloq taanna unnuinnartoq tamarmik atassuteqaqqilerput, Tele-Post nittartakkamini taama allappoq.

Marlunngornermi kalerrisaarut tutsiuppoq, ajoquteqartoqarnera peqqutigalugu innaallagiaaruttoqassasoq. Teknikkerit aaqqissuiartortussat innaallagiaarutinnginnerani Qaqortumiit radiokædeqarfinnut aaqqissuiartorlutik silarlunnera pissutigalugu ingerlariaqqissinnaasimanngillat.

- Qujanartumik sila pitsaanerulermat aamma teknikerit suleqatigiit pikkorissut pilersaarusiorluakkamik Sermeq Helicopters peqatigalugit sulinerisigut, pingasunngorneq ualilluinnartoq radiokædeqarfimmut anngussinnaasimavugut.

- Ajoqutillu aaqqissuullugit, radiokædemili misileraangaatsiareerluta aatsaat attaveqaatit tamarmik aaqqinneri qularnaarsinnaasimavarput, nalunaarutigalugulu, upalugaarsimanermut pisortaq, Kim Hammond Zinck, tugassiutinut nalunaarummi taama nassuiaavoq.

Kujataani pingasunngormat unnukkut nittaalangaatsiarlunilu anorlingaatsiarpoq.