Tele-Post illoqarfinni pingasuni 4G-mik misileraasoq

Attaveqaat 4G, Nuummi, Qaqortumi Sisimiunilu piffissami misilittaaffiusumi Tele-Postip ammassavaa, tamannalu oqarasuaatinik angallattakkanik atuisorpassuarnut sunniuteqassasoq, Tele-Postip tusagassiuutinut nalunaarummini allaaseraa.
Allattoq Mads Lynge
septembarip 30-at 2014 06:28

Qaqortumi, Nuummi Sisimiunilu oqarasuaatinik angallattakkanik atuisut attaveqaat 4G ippassaq septembarip 29-anni atorsinnaalerpaat, oqarasuaatillu angallattakkat atorlugit interneti sukkanerpaaq atorneqarsinnaanngussasoq, Tele-Postip oqaatigaa. Tassa Mobil Mikisumik, Mobil Akullermik aamma Mobil Angisuumik atuisut 4G-mik atuisinnaanngorput:

- Sullitatta amerlaqisut attaveqaammik sukkanerusumik atuisinnaalernerat nutaarsiassaavoq nuannersoq. Piffissami qaninnerpaami attavik misilittassavarput, misilittaanerpullu iluatsissappat siunissami Tusass'-imik atuisut aamma atuisinnaanngortissavavut, innuttaasunut kiffartuussivimi qullersaq Per Svendsen oqarpoq.

4G SIM-kortinik nutaanik pisariaqartitsissaaq

Illoqarfinni pineqartuni atuisut 4G-mik atuilersinnaassappata, oqarasuaataasa angallattakkat SIM-kortii 4G-mik aamma atuisinnaasariaqartut nalunaarutigineqarpoq.

Tele-Post, sullitanut 4G-mik atuisinnaanngitsunik SIM-kortilinnik taamaammat SMS-inik nassiussuisimavoq, sullitallu najukkami Tele-Post Centerimut saaffiginninnissaat aamma kajumissaarutigineqarluni, SIM-kortimmi 4G-mut atorneqartussat akeqanngitsumik tunniunneqartassammata.


Taamatuttaaq TELE-POST-ip oqarasuaatit angallattakkat 4G-mik atuisinnaasut sorliunersut tamaasa allattorpai. Una toorlugu takusinnaavat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq