TELE-POST frimærkerpassuarnik 2014-imi saqqummersitsissaaq

TELE-POST-ip frimærket 24-t aappaagu 2014-imi saqqummersissavai, tamannalu Kalaallit Nunaannut tunngasunik frimærkenik katersisartunit nuannaarutigineqartussaassagunarluni.

Allattoq Nutaarsiassaqartitsivik / Nyhedsredaktionen

decembarip 17-at 2013 06:05

Frimærkiliat Nunatsinni eqqumiitsuliortunit tusaamasaasunit suliarineqartut saqqummersinneqassapput, ilaatigut Frederik Kunngi Kristiansenimit, Nunatsinni nipilersuutinut marlunnut tunngatitai, tassa qilaammut aamma nutsugissamut nuannarinninnermik takussutissiai saqqummersinneqassallutik. Aamma eqqumiitsuliortup Camilla Nielsenip, Nunatsinni erinarsuutinut marlunnut tunngassuteqartut saqqummersissallugit.

Nuummi angerlarsimaffeqanngitsut ikiorneqarnissaat siunertaralugu frimærkimut ilassut ataaseq saqqummersinneqassaaq, taanna Niels Motzfeldtimit suliarineqarluni. Nunatsinni nunaateqarneq pillugu frimærkit marluk aamma saqqummersinneqassapput, Aka Høegh taakkunannga suliarinnittuulluni.

Eqqumiitsuliortut allat soorlu Ena Rosing, Miki Jakobsen, Ivalo Abelsen assiliisartorlu John Rasmussen TELE-POST-imit aamma suliakkinneqarput allallu frimærkenik siullerpaamik suliaqartussat Sissi Møller, Lisa Kreutzmann Isak Brandtilu aamma suliakkinneqarsimallutik.

2014-imi juullip nipitittagaanik saqqummersitsineq, Nunarsuatsinni TV-kkut sivisunerpaamik aallakaatinneqartartup, Kalaallit Nunaannut Juullimi Inuulluaqqussut, Danmarkip Radioata aallakaatittagaanut tunngasoq saqqummersinneqartussatut aamma pilersaarutaavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.