TELE-POST Australiami frimærkinik saqqummersitsinermut peqataavoq
TELE-POST ”2013 AUSTRALIA World Stamp Expo”-mi, maajip ulluisa qulinganniit 15-annut Melbournemi ingerlanneqartumi nuisitsiveqarpoq. Frimærkinik tuniniaasartut angisuut, aammalu Australia Post-imit tikeraartitsisut saniatigut pingaartumik allakkeriviit, nunarsuup kujasinnerusortaaneersut aammalu kangianit killermeersut peqataapput, tamannarpiarlu pissutigalugu TELE-POST peqataatitaqarpoq:
- Allakkeriviit taakkorpiaat frimærkeqarnikkut suleqatiginissaat kissaatigaarput, frimærkinut pisortaq Pertti Frandsen TELE-POST-imeersoq oqarpoq.
Europami aamma Amerikap avannaani frimærkinik katersisartut ikiliartornerisa ilutigisaanik TELE-POST nunarsuup kangianut niuerfinnik nutaanik ineriartortitsisariaqalersimavoq. Nunarsuaq tamaat eqqarsaatigalugu ukiumoortumik frimærkinik saqqummersitsinerit katersuuffittut frimærkinik suliaqartunut tamanut pingaaruteqaleriartuinnarput: Katersisartut, tuniniaasartut, allakkeriviit pilersuisullu, soorlu frimærkinik naqiterisarfiit.
- Taamaattumik nunani allani nunat tamalaat frimærkit pillugit suliaqarnerannut angisuunut peqataanivut tamaasa attaveqarnissamut periarfissat aningaasaqarnikkut iluaqutigineqarsinnaasut tamakkiisumik atorluarneqartariaqarput, Pertti Frandsen oqarpoq.