TELE-POST angerlarsimaffeqanngitsunut 150.000 koruuninik tunissuteqartoq

Frimærkip tapiliutitallip tuniniarneqarneranit sinneqartoorutit TELE-POST-ip angerlarsimaffeqanngitsunut suliniutinut atugassatut agguaappai.
Allattoq Simon Uldum -
novembarip 25-at 2016 05:25

TELE-POSTcheckinik marlunnik 75.000 koruuninik aningaasartaqartunik angerlarsimaffeqanngitsut pillugit Nuummi suliniaqatigiiffinnut tunniuppai.

Tunineqartut taassaapput unnuisarfik Cafe Kialaarfik aamma peqatigiiffik NoINI. Aningaasat tunniunneqartut frimærkip tapiliutitallip 2014-imi januaarimi saqqummersup tuniniarneqarneranit sinneqartoorutaapput. Frimærki tapiliutitalik ukiut pingasut ingerlanerini tunisaalluarsimavoq.

- Ukiut tamaasa TELE-POST inuiaqatigiinni suliniutinut pitsaasunut tapersersuinissamut atugassamik frimærkimik saqqummersitsisarpoq. Suliffeqarfitsinnut tamanna pingaaruteqartorujussuuvoq, tassami atuisuvut sinnerlugit inuiaqatigiinni tapersersortariallit peqataaffiginissaannut akisussaaqataanerput ilisimaaralugu saqqummersittaratsigu, TELE-POST-ip attaveqaqatigiinnermut pisortaa, Arnakkuluk Jo Kleist, taama oqarpoq:

Ineriartornermullu aqutsisoq Allan Pertti Frandsen ima ilassuteqarpoq:

- TELE-POST-imi inuiaqatigiinni akisussaaqataanerput pingaarutilik ilisimaaralugu ukiut tamaasa frimærkimik tapiliutitalimmik saqqummersitsisarnerput ingerlatiinnarparput. Assut tuppallernarpoq inuit nunatsinniittut avataaniittullu taama amerlatigisut frimærki tapiliutitalik pisiarisarmassuk. Frimærkinik tapiliutitalinnik tuniniaaneq taama annertutigisumik isertitaqarfiunera tulluusimaarnanngitsuunngilaq.

 

Assi © : TELE-POST

 

Eqqumiitsuliortup Niels ”Mo” Motzfeldtip frimærki tapiliutitalik suliaraa.