TELE-POST aamma Meeqqat Inuunerissut qanittumik suleqatigiilersut
MIBB Nunatsinni meeqqat pillugit annertuupilussuarmik suliaqarpoq, ilaatigut suliniut "imermi maligaasap siaruarneratut" aqqutigalugu, meeqqat kinguaassiuutitigut atornerlugaasarnerat immikkut sammillugulu ilisimasanik siaruarteraluni. Frimærkip nutaap saqqummiunneqarnerani, aningaasat peqatigiiffiup inuiaqatigiinnut iluaqutaasussamik suliniarneranut atorneqarnissaat peqatigiiffiup siulittaasuata neriorsuutigaa.
-Suliatsinnut tunniusimasorujussooreerpugut, ullumikkut tunissuteqarfigineqarnitsigut qularutigineqassanngilaq siunissami suli suliatsinnik aallussinerulissasugut”, Britta Nielsen Johansen oqarpoq.
Nikolaj Andersen Olsvig ukiormanna frimærkimik ilassutitut nalilimmik titartaasuuvoq, frimærkelu 9,00 kr.-eqarpoq ilassutillu 50 ørenik naleqarluni. Frimærki ataasiakkaarlugu, ark-inngorlugu imaluunniit arkit sisamakkuutaarlugit tuniniarneqassaaq.
- Meeqqat Inuunerissut / Bedre Børneliv Kalaallit Nunaanni meeqqat pisinnaatitaaffii pillugu annertuupilussuarmik suliaqartuuvoq. Taamaammat MIBB 2013-imi frimærkip ilassutitut nalillip tunisaaneranit sinneqartoorutinik pissarsisussatut piukkunnassuseqarpoq, TELE-POST-imi tuniniaanermi pisortaq Pertti Frandsen oqarpoq.