Tele nalunaarasuartaateqarnermi aqutsisunut ingerlatitseqqiivoq
Unammilleqatigiinnermut ataatsimiititaliap februaarip 14-ani TELE Greenland ulluni 14-ini periarfissalerpaa Nuuk Skynet attaveqaatinik atueqatigiinnissamut akimik neqerooruteqarfigissagaa.
Akigitinniarneqartunulli neqeroorutit Nuuk Skynet-imit iluarineqanngillat, taakkuami malillugit TELE Greenlandip attaveqaatinut atueqatigiinnissamut naleqqutinngittunik akinik neqerooruteqarsimammat. Taamalu pisoqarmat TELE Greenlandip nalunaarasuartaateqarnermi aqutsisut suliamut akuliunnisssat piumasarimavaa, akitigitinniarneqartunullu neqeroorutaasut nalileqqullugit.
Nuuk Skynet-imi pisortap, Peter Engsig Karup-ip oqarnera naapertorlugu TELE Greenland unammillertiminut akisuallaamik marloriarluni neqerooruteqarsimavoq.
- Akinut naapertuuttunut akiliuteqarusuppugut, aammalu iluanaaruteqarusulluta, aamma tamanna inatsisitigut ersarissumik allassimavoq. Taamaammat oqartoqarsinnaanngilaq Skynet akikillisaavigineqarusuttoq. Nalunngiinnarparput TELE Greenlandip attaveqaatinut atueqataanissatsinut ukiumut akiliutigisartagassatsitut neqeroorutigisaa, tassa 10 million koruunit naapertuutiginngitsut, Peter Engsig Karup oqarpoq.
Kisianni TELE Greenland isumaqarpoq suliassami uani Namminersorlutik Oqartussat attaveqarnermut peqqussutaat ersarissoq.
- Naleqquttuunngilaq unammillerniartut attaveqaasersuinitsinnut aningaasartuutigisimasatsinnut akileeqataanatik attaveqaammik atuissappata, TELE Greenland allappoq.
TELE Greenlandip Nalunaarasuartaateqarnermi aqutsisunut ingerlatitseqqiinerata kingorna, Nuuk Skynet Nuummi aqquteqanngitsumik internettimik annertuumik nassiussuivimmik tuniniaaniarluni siorna maajimili piareeqqagaluartoq, suli utaqqeqqittariaqassaaq. Nuuk Skynet, Nuummi tuniniaasarnissami saniatigut, Namminersorlutik Oqartussanit februaarip aallartilaarnerani Sisimiuni aamma Ilulissani aqquteqanngitsumik internettimik nassiussuivimmik tuniniaasarnissaminut akuerineqarpoq.
