Tele-mi tillinniaq tigusaraat

Qaanaami Tele-Postip illuutaani sapaatip akunnerata naanerani tillinniarnermut aserorterinermullu atatillugu, Qaanaami politiit ataasinngornerup unnukkuani angut tigusaraat. Angut killisiorneqarnermi kingorna iperangaavoq.
Allattoq Elisa Isaksen
januaarip 30-at 2013 06:31

Marloriarluni tillinniarnerni angut kisimiissimarpasinngilaq. Tallimanngornermi januaarip 25-anni unnukkut tillinniarneq siulleq pivoq, tassani oqarasuaatit angallattakkat 25.000 koruuninik naleqartut tillinneqarput.

Januaarip 26-anni unnukkut aamma tillinniartoqaqqippoq aserorterisoqarlunilu. Tassani oqarasuaatit angallattakat 95.000 koruuninik nalillit tillinneqarput.

Tigusaasumut tunngatillugu paasissutissat suli ilisimaneqanngillat, taannali Qaanaami eqqartuussivimmut ippassaq sassartinneqarpoq.

Tillinniarnerup aserorterinerullu annertussusaa TELE-POST-imit ippassaq nalilersorneqarpoq, pineqartunut taarsiinissanik piumasaqaateqarnissaq siunertaralugu.

Maannamut naatsorsuigallarnerit takutippaat aserukkat, tillitallu 200.000 koruunit missaannik naleqartut, sulisoqarnermut pisortaq Karl-Henrik Simonsen ilisimatitsivoq.