TELE-mi pisortanngorlaaq isornartorsiorneqarpoq millionillu sinnerlugit aningaasarsiaqassalluni
Eqqartuussissuserisut misissuineranni nutaami tamanna isummerfigineqartoq, aviisimi Jyllands-Postenimi ullaaq-manna allaaserineqarpoq.
DSB-p piginneqatigiiffiani, DSBFirstimi, pissutsit Søren Eriksenip DSB-mi siulersuisunut amigartumik nalunaarutigisarsimagai, misissuinermi isornartorsiorneqarpoq.
Isornartorsiunerilli tassa ima sakkortutiginngillat, Søren Eriksenip soraarnermini immikkut akissarsiassai, 4 millionit koruunit, DSB-p tunniutinngitsoorsinnaanagit, soraarsitaagaluaramimi suliffimminut atsiornikkut isumaqatigiissutaa naapertorlugu aningaasat taakku pinngitsoorani pisussaavai, Jyllands-Postenimi allapput.
Søren Eriksen Tele Greenlandimi aasaru pisortanngussasoq sapaatip-akunnera kingulleq saqqummermat, aningaasanik aqutsinermut professori, Anders Drejer, Radioaviisimut ilisimatitsivoq, pisortaaninngortussaq amigartunik paasissutissiisarsimanerminut pisuutitaanngitsoq.
Paasissutissallu nutaat tamanna aamma uppernarsarpaat, Anders Drejer, aviisimut Jyllands-Postenimut ullumi oqarpoq.
- Isornartorsiuinerit imatorsuaq ilumoorussassaanngillat. Suliffianut atatillugu ukioq ataaseq misissuisoqareersorlu paasisartik una kisiat paasisimappassuk malersoqqittariaqanngilaq, Anders Drejer naliliivoq.
Søren Eriksenilli soraarsitaanera pissusissamisoortoq isumaqarpoq.
Siulersuisut pisortamik tatiginnikkunnaarpata, soraarsitsisoqartariaqarpoq, Anders Drejer aviisimut Jyllands-Postenimut oqarpoq.