Tele iluarseeriarniarpoq
decembarip 28-at 2004 05:26
Nalunaarasuartaaserisoqarfiup Tele Greenlandip Nuup Qeqertarsuatsiaallu akornanni sakkortusaavik ajoquteqalersimasoq ullumi sila akornusiissanngippat iluarseriassavaat.
Sakkortusaavik juullerujussuarmi anorersuaraa atassutaaruppoq, kujataanilu radiokkut TV-kullu KNR-ip aallakaatitaatitai tusaaneqarsinnaanatillu isiginnaarneqarsinnaanngillat.
Paamiuniit kujammut interneti aamma attaveeruppoq, taamaaqataanillu akiliiniarnermi tigutsisit aamma atorunnaarput.
Pilersaarutaavoq teknikerit nalunaaqutaq qulingiluanut helikopterimut ilaallutik iluarsaajartorlutik aallassasut.