Tele Greenlandip suliniutiginiagaa Aleqa Hammondip tapersersorpaa

Meeqqat peqataatillugit pornolianik internetsikkut atuineq akiorniarlugu Tele Greenlandip suliniutiginiagaa, Ilaqutariinnermut Inatsisinillu atortitsinermut Naalakkersuisup, Aleqa Hammondip, tapersersorpaa.

Filterit taamaattut Danmarkimi, Norgemi, Sverigemi Savalimmiunilu telemik ingerlatsiviit ilisimavaat.

- Pinerluttulerinermi inatsisip Folketingimi allanngortinneqarnera, Namminersornerullutik Oqartussat suliniuteqarneratigut, 2004-mi akuersissutigineqarpoq, meeqqat peqataatillugit pornoliorneq, tamakkuninnga pigisaqarneq siaruarterinerlu inerteqqutigineqarlutik – meeqqat peqataatillugit pornolianik internetsikkut atuinermut aamma tamanna atuuppoq, Aleqa Hammond oqarpoq.

- Meeqqanik kinguaassiuutitigut atornerluineq inuiaqatigiinnit akuerineqarsinnaanngitsoq Tele-p suliniutaani sakkortuumik oqariartuutigineqarpoq. Meeqqat peqataatillugit pornolianik imalinnut filteriliinikkut iseriarnissamut ajornarsiinnarnani, inatsimmik unioqqutitsisunik politiit paasiniaasarnerannut siuariaataassaaq, Aleqa Hammond ilanngullugu oqarpoq.