Tele Greenlandip pisortartaassaa atorfininniarunnaarpoq
- Suliffeqarfissuaq qanorluunniit angitigigaluaruni, inuinnarnik ingerlanneqartarpoq, aamma Tele Greenlandi. Tassami inuit tamavimmik inuuneranni naatsorsuutigineqanngikkaluartunik pisoqartarpoq, tassalu pilersaarutit, neriorsuinerit, ilami atsioqatigiilluni isumaqatigiissusiat atorunnaarsinneqartariaqarnerinik kinguneqarsinnaasarluni, Agner Mark oqarpoq.
Søren Eriksenilli atorfinitsinneqarnissaa upernaaq tamanut tusarliunneqarniariartoq isornartorsiuiniuttut tulleriiaaginnavileraluarput. Taannami, siornatigut DSB-mi pisortaagaluartoq, soraarsitalluni millionilikkaanik ajunngittorsiassarsitinneqarnera qassiiliutaasimaqaaq, kinguninnguatigulli qassiiliutigineqartut nipangiunneqarput, tassami naalagaaffik unioqqutitsilluni DSB-mut tapiissuteqartarnera pillugu eqqartuussivilersuussisoqarmat Søren Eriksen pinngitsuutinneqarmat.
Søren Eriksenimilli atorfinitsitsigaluarneq aamma nunatsinni qassiiliutaaqisoq Tele Greenlandip illua tungilerpaa, Søren Eriksenimillu atorfinitsitsigaluarneq Agner Markip uggorinnginnerarpaa:
- Uggorinngerluinnarpara. Tassami atorfinitsitsinialeratta suna tamaat qaqilerparput nalilersuiffigalutigulu. Søren Eriksenimi kikkunnit tamanit unnersiutigineqarpoq, kikkullu tamarmik suliaminut pikkorissuunerarlugu. Aamma pisuutitsiniutaagaluit tamavimmik akuuffiginngilluinnarai tamatigut uppernarsarneqareerpoq. Søren Eriksenilli tunuarniuteqarnera inuttut inuunermi naatsorsuutigineqarsinnaanngitsumik pisunik tunuliaqutaqarpoq, tassalu uagut, ilami kialuunniit iliuuseqarfigisinnaanngilaat. Agner Mark taama oqarpoq, Søren Eriksenilli tunuartariaqalernera Tele Greenlandip ingerlanneqarneranut akornutaanaviarnerarnagu.
Naak tunuarniuteqarneq uggornaraluaqisoq siumut isigisoqartariaqassaaq, Søren Eriksenimullu taartissarsiortoqaqqinnissaa siunniunneqarsimasoq Agner Markip oqaatigaa:
- Tunuarniuteqartariaqalerneq tassanngaannangaarmat, asulu aasami sulinngiffeqarnrup nalaani pimmat, siulersuisulluunniit suli ataatsimiigiaqqusinnaasimanngilakka. Kisiannili piffissaqaleriarutta ataatsimiikkasuassaagut pisortassarsioqqinnissarpullu tuaviornerpaamik aallarteqqissallutigu, Agner Mark oqarpoq.
Steen Montgomery-Andersen pisortaanertut maanna ingerlaannarallassaaq, taanna pisortaanerusimasoq Brian Buus Petersen siorna tunuarmalli taamatut inissikkallarsimasuuvoq.
