Tele Greenlandip nunanut allanut unammillersinnaanini nukittorsarniarlugu
Københavnimi ingerlatami ilaat Kalaallit Nunaannut nussorniarpai, ingerlatalli nuunneqarsinaanngikkallartut suli Københavnimi ingerlanneqarallassapput, Tele Greenlandip siulersuisuisa siulittaasuat Kaj Egede oqarpoq.
Siulersuisut ukioq ataaseq matuma siorna aalajangerpaat Telep unammillersinnaassuseqarnera ingerlatiinnarumallugu akinik apparsaaneq nanginniarlugu.
Piginnittullu sinneqartooruteqarnissamik piumasaat piviusunngortissinaajumallugu Telep ingerlatai sanigorsaavigalugit aaqqinniarlugit, taamalu Københavnimi sulisut tamanna pillugu oqaloqatiginerat aallartereerpoq, tamannalu tunngavigalugu Københavnimi pisortaqarnikkut allannguineqartussanngorluni, Kaj Egede oqarpoq.
Taakkua saniatigut inuit 41-t aamma ilanngassapput, kisianni qanoq amerlatigisunik ilanngassasut siulersuisut aatsaat decemberi oqaluuuserissavaat.
Kisianni sanaartor nermut tunngatillugu Københavnimi aqutsineq soraarsitsinernik eqqorneqassaaq Kalaallit Nunaannut nussorneqarnissaa siunertaralugu.
Taamaakkaluaq Københavnimi immikkoortortaq inuttaqartuarallassaaq, ilaatigut Copenhagen Teleport, qaammataasanik attaveqarnermi tigoraavik, Avedøre Holmimiittoq ingerlaannaraallassaaq, Kaj Egede oqarpoq.
Tele Greenlandip Københavnimi pisortaasa ilaat pingasut atorfimminnit tunuareerput, Tele Greenlandilli siulersuisuisa siulittaasuat, Kaj Egede, oqarpoq taakkua soraarnerat pissusissamisoortumik oqaloqatigeereernikkut taama aaqqitaasoq.
