Tele Greenland: Issi tuniniarneqarsinnaavoq

Kalaallit Nunaanni issi tuniniarneqarsinnaava? Aap, tamanna ajornanngitsoq Tele Greenlandimi isumaqartoqarpoq. Tassami kabeli immap naqqatigoortoq iluaqutsiullugu, qarasaasianik ingerlatsiviit nunarsuatsinniittut, nunarsuup avannarpasissuani inissiiumallissagaluarpata issimik naammattorsuarmik neqeroorfigineqarsinnaassammata. Qarasaasiammi programmeqarfiinik kissartorujussuarnik nillusaaneq nukimmik ullutsinni atuiffiusorujussuummat, aviisi Børsen Klima ippassaq taama allaaserisaqarpoq.

septembarip 03-at 2008 05:16

Qarasaasianik suliffeqarfiit, soorlu Google, qarasaasiat programeqarfippassuinik ingerlatsisuupput. Googlep unammillertaasa ilaat – Microsoft – Chicagop avatinnguani dollarsit milliardit affaat atorlugit qarasaasianut programeqarfissuarmik nutaamik sanaartoqqammerpoq. Nukimmillu atuinerup affaa nillusaanermut tassani atorneqartarmat, tamaani nukissiorfinnik nutaanik pingasunik sanaartortoqartariaqartoq, Børsen ilanngullugu allappoq.

Suliffeqarfiit akeqanngitsumik nillusaasinnaagunik nukimmik sipaagaqarsinnaasut tamatumani oqaatigineqarpoq – tassa qarasaasiat programeqarfiinik Kalaallit Nunaanni pilersitsinermikkut sipaarsinnaasaat. Tele Greenlandimit taama tunngavilersuisoqarpoq.

-Issi Kalaallit Nunaanni amigaatiginngilarput. Qarasaasiallu programiini nillusaajuarnissaq pitsaassutsimut aamma aalajangiisuulluinnartuummat, ilimagineqarsinnaavoq Kalaallit Nunaat piffissap ingerlanerani qarasaasiat qitiusumik ingerlatsiviinut programeqarfiinullu inissiivitsialanngortoq. Tele Greenlandip teknikkikkut pisortaa, Jørn Jespersen, Ingeniørimut taama oqarsimanerarlugu Børsenimit issuarneqarpoq.

Tele Greenland: Issi tuniniarneqarsinnaavoq

Aamma atuaruk