TELE Greenland A/S 106 millioni koruuninik 2006-imi sinneqartoorpoq

Tele Greenland A/S-ip siorna sinneqartoorutigisimasai 2005-imut naleqqiullugu qaffariarujussuarsimapput.

Tele Greenlandimi siulersuisuni siulittaasup Kaj Egede-p ileqquusumik ippassaq ataatsimeersuartoqarmat ukiumooortumik nalunaarut saqqummiuppaa, suliffeqarfissuullu 2006-imi sinneqartoorutai akileraarutit peernagit 106,7 millioni koruuniusimasut paasinarsivoq.

Akileraarutit peernagit 2005-imi sinneqartoorutit 71,4 millioni koruuniusimapput.

Tassa, allatut oqaatigalugu: Akileraarutit peernagit sinneqartoorutit 35 millioni koruunit sinnerlugit qaffariaateqarsimapput.

Kaaviaartitat malunnaatilimmik amerleriaateqarsimanerat tamatumunnga pingaarnertut pissutaasoq, Tele Greenlandip tusagassiuutinut nalunaarutaani atuarneqarsinnaavoq.

Tele Post akileraarutit ilanngarnagit 2005-imi 15 millioni koruuninik iluanaarfiuvoq.

Immap naqqatigut kabel-imik 2007-imi pilersitsinissaq pillugu misissuinerit aallartinneqassasut aamma aalajangiunneqarsimavoq.

Immap naqqatigut kabel-iliinikkut nunap iluani attaveqaatitigut pitsanngoriaateqarsinnaanissaq ilimagineqarpoq, soorlu internetikkut attaveqarnerit sukkatsissinnaanngussallutik.

Radiukkut sakkortusaaviit nutarterneqarnerat siorna aallartippoq, Avannaanilu ukioq manna nangeqqilluni. Pilersaarutit malillugit ingerlasoqassappat kujataani sakkortusaaviit aappaagu nutarterneqassapput.

Tele Greenland A/S-ip ukiumoortumik nalunaarutaa Attaveqarnermut naalakkersuisumit Kim Kielsenimit akuerineqarpoq, sulisullu angusarisimasaannik qutsavigineqarlutik.