Teknikkikkut isumassarsiat Sisimiuni Maniitsumilu aappaagumiit katersuuffeqalissapput
Teknikkikkut isumassarsiat katersuuffissaat Sisimiuni Sanaartornermi Ilinniarfimmi Maniitsumilu ATI-p ataani aappaagu pivisunngortussanngorpoq. Timitaliisussanngorput Danmarkimi teknikkikkut ilinniarnertuunngorniarfik, DTU, Namminersornerullutik Oqartussani Inuussutissarsiornermik Pisortaqarfik, Kalaallit Nunaani Takornariaqarnermi Inuussutissarsiornermilu Siunnersuisoqarfik aamma Sisimiuni Maniitsumilu Inuussutissarsiornermi siunnersuisoqatigiit.
Innovationscenterit, tassa teknikkikkut ineriartortitsinnermi suliffeqarfiit, kikkunnit tamanit sanaartornermut, avatangiisinut aalisarnermullu tunngasunik isumassarsiatsialannik tunniussisinnaasunit akuuffigineqarsinnaapput, taama nassuiaavoq Sisimiuni sanaartornermut Ilinnniarfiup pisortaa Jokum Møller. Sisimiuni taanna ilinniarfik Danmarkimilu teknikkikkut ilinniarnertuunngorniarfik, DTU, peqatigiillutik isumassarsiamik pinngortitsisuupput. Taakkua 2001-mili Issittumi teknikkikkut ineriartortitsinermi sulianik suleqatigiissuteqalerput.
- Maani Kitaani sinerissami maralluit qanoq atorneqarsinnaanissaat, igalaat issittumut naleqqussakkat, seqernup kissaata kiassarnernut assigiinngitsunullu atorluarneqarnissaa sammineqarsinnaapput, Jokum Møller oqarpoq.
Sammineqarsinnaasut ilaattut ilanngullugu oqaatigaa, Issittumi imermik saliineq, tassami massakkut salinnagu igiinnaavillugu kuutsittaratsigu, taamaalilluni akisoorujussuanngortarluni, taakku immamut kuutsitsinnagit qanoq salinneqartarsinnaanissai, imermik pilersuineq eqqarsaatigalugu assigiinngitsut aamma sammineqarsinnaapput.
Nunaminngaaniit kiaap atorluarneqarnissaa, immap kissaata aamma atorluarneqarnissaa eqqaaneqarput. Teknologimut tunngasut sorpassuit ineriartortinneqarsinnaasut Jokum Møllerip eqqaavaa, neriuutiginerarpaa Kalaallit Nunaanni Issittumilu tamatuma atorluarneqarnissaa.
Jokum Møller aamma oqarpoq Sisimiuni Amutsiviusimasoq Maniitsumilu fabrikkip ilaa teknikkikkut ineriartortitsinermi isumassarsianik katersuuffittut atorneqassasut.
