Teknikerit Aasiannukassapput

Aasianni ininik attartortut nuannaarutigaat, Jens B. Frederiksenip misissuisoqarnissaanut nalunaaruteqarmat. Taamaattorli neriorsuuteqarnera, inissiani najugaqartut allannguutinik takoqqaartinnatik upperinavianngikkaat, najugaqartup Miki Jensenip oqaatigaa.
Allattoq Sorlannguaq Petersen
marsip 16-at 2012 14:54

- Paasigakku ajornartorsiutit qanoq annertutiginersut, aalajangerparput teknikerinik Aasiaannukartitsissalluta.Tassani paasissavarput ulluni qaninnerni, arlaatigut massakkorpiaq iliuuseqartoqarsinnaassanersoq, Ineqarnermut Naalakkersuisoq Jens B. Frederiksen, ippassaq taama oqarpoq.

Taamatullu nalunaaruteqarnera, najugaqartup Miki Jensenip nuannaarutigaa. Iliuuseqartunilli takoqqaartinnani upperiumanngilaa.

- Qujanartorujussuuvoq taamatut iliuuseqarnialermata, kisianni uppernarsiuminaappoq taamatut oqaaseqaannarnerat. Uppernarsaatissamik takunnissinnaaleruma aatsaat upperilerumaarpara. Najugaqartoq Miki Jensen oqarpoq.

Taannalu isumaqarpoq, ineqarnermut kiassarnermullu akiliutit inissiani nutaanngitsuni naleqqutinngilluinnartut. Siunnersuutigaalu akiliutit apparneqarsinnaasut, inissiallu iluarsartuunneqareerpata akit qaffaqqinneqarsinnaaneralugit.

Miki Jensen ilaquttanilu inissiaqarfimmut 2009-imi nuupput, taamanili kiassaatinik kissartoqarniarnermik ajornartorsiuteqartuartarput. Maannakkullu sivitsorpoq, imermik uunartoqarpiaratillu kiassaatinik kissartoqarpiaratik.

Miki Jensen ilaquttanilu, allanillu peqateqarlutik atsiornernik katersisuupput. Atsiornerit ippassaani tunniunneqarput. Taassumalu teknikerit misissuinissaat pissanngatigaa, tassani inissiat pineqarput aqqusinerni Nalunnguarfimi, Aqqullummi Wille Brandtsvejillu ilaani.

Miki Jensenillu naatsorsuutigaa, inissiani init ilaat matuneqassasut ajungaarmata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq