Isikkamik arsaalluni GM Teklep Kugsakkormiut tupaallaatigigai
Nunatsinni arsaannermi pissartanngorniuttoqarnerani, arsaatillaqqinnerpaat Qasigiannguani ulluni makkunani katersuunneranni nuannisartoqaqaaq. Arsaattartut illoqarfimminni unammisaqattaarnerminni angusarissaarnerat tupaallaataasoq, nunanut allanut unammisartunut sungiusaasup oqaatigaa.
- Kugsak tupaallatsitserujussuartoq isumaqarpunga. Arsaattarfigissaanngikkaluarlutik angusarissaarnerat tupaallaatissaavoq. Arsaattartut amerlanerit unammisaqattaarlualaavipput, Kugsammiulli unammilluartorujussuupput. Angusaqarsinnaallutimmi upperaat, ilungersornermikkullu arsaalluaqalutik. Tamanna nuanneqaaq, nunanut allanut unammisartunut sungiusaasoq Tekle Ghebrelul oqarpoq.
Pissartaasut aamma piukkunnarluarput
Kugsalli kisimi angusarissaanngilaq. Aammali siorna pissartaasut B-67-imeersut pissartaanerminnik illersuilluarnerat maluginiagassaavoq.
- Siorna pissartanngortut qunugisassaalaarunarput. Pointit pissarsiarisinnaasatik pissarsiaraat puljeminnilu ajugaareerlutik pissartanngorniutivinnissamut anngunniarnissaminni G-44-mut unammisussanngorlutik. Tassani unammilluartoqarnissaa naatsorsuutigaara, nunanut allanut unammisartut sungiusaasuat Tekle Ghebrelul naggasiivoq.
Unamminerit ingerlanneqarfissaat allanngortut
Arsaannermik soqutigisalinnut aamma oqaatigilaarsinnaavarput, pissartanngorniutivinniissamut anngunniulluni ullumi unamminissat nalunaaquttap akunneranik ataatsimik siuartinneqarmata.
Pissartanngorniutivilluni unamminissamut anngunniunnermi siullermi Kugsak aamma IT-79 nalunaaqutaq ataatsimut unammillutik aallartissapput. Pissartanngorniutivilluni unamminissamut anngunniunnerit aappaanni G-44-p aamma B-67-ip unamminissaat nalunaaqutaq pingasunut aallartissaaq.
