ASSIT Team Greenland Join Feel Jumpimut piareerput

Kalaallit unammisartut aappalaartunik kavaajallit Nuup illoqarfiani takussaalluarput ataatsimoorpaseqalutillu. Sapaatit-akunneranni uani unammissapput killissiminnillu misileraassallutik.

- Amerlanersaannut kulturikkut timersornikkullu aallutaqalernissamut aallarniutaasinnaavoq, allat aqqutit allat atussavaat, qanorli pisoqaraluarpalluunniit Arctic Winter Gamesimut peqataanertik misilittagaqarfigilerumaarpaat angerlarunik atorluarsinnaasaminnik, Kalaallit Nunaanni Timersoqatigiiffiit Kattuffianni generalsekretæri, Carsten Olsen, tusagassiorfinnut nalunaaruteqarluni taama allappoq.

Unammiuaarnerit ilinniarfigissavagut

- Inuusuttortattami timersornermik aallutaqaannarnissaat Kalaallit Nunaanni Timersoqatigiiffiit Katuffiata tungaanit neriuutigaarput, pingaartumik ilisimagatsigu ataqatigiinnikkut, aqutsinikkut peqqinnissakkullu timersorneq angusaqarfiulluartartoq. Aamma ilisimavarput ataqatigiinneq timersortartut ataasiakkaat nukittorsaatigisaraat, taamaammat timersorneq pissarsiffiulluartarpoq.

- Timersornerup iluani piginnaanillit amerlisarumallugit Nunatsinnilu sumiiffinni assigiinngitsuni ingerlattakkavut naleqqussarniarlugit unammiuaarnerit ilinniarfigissavagut inuusuttortavullu oqaloqatigalugit, Carsten Olsen allappoq.

Kalaallit unammiuaarnerni peqataatitaat mobili atorlugu immersugassamik tunineqassapput, kinaanertillu taanngikkaluarlugu timersoqatigiiffiit kattuffiata apeqqutaanik akissuteqarsinnaassallutik.

- Taamaaliornikkut peqataatitavut inuusuttut, maanna siunissamullu, qanoq isumaliuteqarnersut paasiniassavarput, Carsten Olsen taama naggasiivoq.