TDC-p akigititai Tele-mit qaffasippallaarsorineqarput

Allattoq Mads Lynge
maajip 25-at 2005 14:34

Danmarkimi attaveqaatilerisup TDC-p nunatsinnut sianernermut akigititai Tele Greenlandimit qaffasippallaarsorineqarput.

TDC-lli tungaaninngaanniit akigitinneqartut naleqquttuusorineqarput:

- Akit pillugit TDC-mik isumaqatigiinniarnitsinni arlaleriarluta ilisimatitsissutigisarsimavarput Danmarkiminngaanniit nunatsinnut sianernermi TDC-p akigititai qaffasippallaartut, Tele Greenlandip pisortaanut tullersorti Erik Haldager ataasinngormat radioaviisimut oqarpoq.

Illua’tungaani TDC-mi pisortat ilaat Gert Rieder oqarpoq akit atuuttut naapertuulluinnartut naleqquttuullutillu:

- Danmarkiminngaanniit Kalaallit Nunaannut sianertoqartillugu aningaasartuutigisartakkavut naapertorlugit akigititavut aalajangersortarpagut, taakkulu atuisunut akigititanut aalajngiisuusarput, TDC Privatimi pisortaq Gert Rieder oqarpoq.

Danmarkiminngaanniit nunatsinnut sianertoqaraangat, Tele-p centraliatigoortinneqartarput. Nunatsinnut sianernermi TDC-p akigititai minutsimut 7 koruuningajaallutik 6,75 koruuniuvoq, nunatsinniillu Danmarkimut sianerniaraanni 2 koruuneqarluni.

Danmarkimi attaveqaatit minnerit ilaat Supertel akikinnerusumik nunatsinnut sianertitsisarpoq, minutsimut 3 koruunit inorlugit sianertitsisarmat.

Taamaasilluni TDC-p iluanaarutai Supertelimut naleqqiullugit annertunerungaatsiarput.

Danmarkiminngaanniit nunatsinnut sianertut 70 procentii TDC-kkoorlugu ingerlateqqinneqartarput.