TB-p Inuit akornanni atugaarnera pimoorulluinnarlugu Canadap iliuuseqarfiginiarpaa

Tuberkulose pillugu periusissaq, Inunnut immikkut suliarineqartoq, Canadap Peqqissutsimut minsiteriaqarfiata sapaatit akunnerani uani saqqummersippaa.
marsip 26-at 2013 08:00

Canadami Inuit tuberkulosemik nappaateqartut nunarsuarmi amerlanersaraat. Inuit TB-mik tunillatsittut Canadami nunap inuerinngisaanit Canadami inunngortunit 254-eriaammik amerlanerupput. Nunani ineriartortinniakkat amerlanersaannut naleqqiullugu amerlanerusupilussuupput nunarsuarmilu amerlanerpaat ilagalugit.

Terry Audla, Canadami Inuit siuttuat, ullumi oqarpoq nunami Canadatut ittumi TB-p tuniluussinnaanera paasinanngilluinnartoq. Aammattaaq oqaatigaa taamatut periusissamik saqqummersitsinikkut Inuit akornanni TB-mik nappaatillit ikilisarneqarnissaannut aqqutissat pitsaasut ilagigaat.

Periusissaq akuersissutigineqannginnerani Inuit Nunagat akornanni tuberkulose oqartussanit misissuiffigineqarsimavoq, taakkulu oqaatigaat Inuit akornanni TB akiorneqassappat illunik isugutanngitsunik inuppassuarnillu najugaqarfiusussaanngitsunik peqqinnartunik nutaanik sanaartortoqartariaqartoq. Aammattaaq Inuit nerisassanik peqqinnartunik naleqquttunillu akilinnik pisisinnaanissaat pisariaqarluinnartoq, aammattaaq Canadami Inunnut tamanut atuuttussamik peqqinnissakkut kiffartuussinermik pitsaanerujussuarmik pilersitsoqartariaqartoq.