Nakorsaaneq TB akiorniarlugu tamatta kivitseqataasariaqarpugut
Peqqissutsimut Naalakkersuisoqarfiup TB pillugu nuna tamakkerlugu 2017-miit 2021-mut periusissiaa naapertorlugu TB-mik nappaateqartut 2025-imi affaannanngorsimanissaat siunertaavoq.
Siunertarlu angujartuaaritsik nunatta nakorsaanera oqarpoq:
- Ukiuni kingullerni sakialluummik napparsimasut ikilinikuupput, taamaammat ajunngitsumik ingerlavugut, nunatsinni nakorsaaneq Henrik L. Hansen taama oqarpoq.
AAMMA ATUARUK Napparsimasut 18-it napparsimmavimmi TB-mik tunillanneqartut
Nunatsinni 1980-ikkut aallartilaarneranni nunani killerni allanisulli TB-ertoqanngigajalluinnarpoq, nappaammik eqqugaasut 1990-ikkunni amerliartoqqilertut pisortanit nalunaarsorneqarput, 2010-ilu amerlanerpaammata, ukioq taanna tunillatssissimasut 115-it nalunaarsorneqarput.
TB-mik napparsimasutut 2013-imi 93-isut 2018-imi 49-sut nalunaarsorneqarsimapput.
Nunatta kujataanni tunumilu nappaammik TB-mik tunillanneqartut amerlanerpaapput.
Agguaqatigiissillugu inuiaqatigiit 100.000-iuppata kujataani 1000-it sinneqartut TB-mik 2017-imi nappaateqalerput, tunumi 400-ut missaanniillutik. Taakkualu qimerluussagaanni, kujataani Narsami, tunumilu Tasiilami nunatsinni illoqarfinnut allanut sanilliullugit tunillatsissimasut amerlanerujussuupput.
2013: 93
2014: 99
2015: 77
2016: 61
2017: 57
2018: 49
- Taammaammat illoqarfinni taakkunani TB-toqarnera upassagaanni immikkut iliuuseqarnissaq pisariaqarpoq, Henrik L. Hansen oqarpoq.
AAMMA ATUARUK Nunatta kujataani sakialluttorpassuupput
Ajornartorsiulli tamanna napparsimaveqarfiup kisimiilluni kivissinnaanngikkaa taanna isumaqarpoq, taamaammat aalajangiisartunut erseqqissumik kaammattuuteqarpoq:
- Tassalu angerlarsimaffeqannginnermik inuillu inissiani pitsaanngitsuni tattoqisaallutik najugaqarnerinik ajornartorsiutinut
inuiaaqatigiinni aamma allat iluarsiisarisqarput, nakorsaaneq Henrik L. Hansen taama oqarpoq.
Nunarsuaq tamakkerlugu nappaatip TB-ip 2030-imi nungutivinnissaa anguniagaavoq.