Tatsimi uumasorsuaq aavarianit takuneqarpoq

- Pisulluta aallaratta ullaap tungaanniit qaqqap qaavatigut, taava ilagut kingulliulaarlutik aallartussaariarmata isumaqarlunga umiaaqqamik avalassimasut, qattungasorujuungami taanna taseq ilaa, isingillualeriarakku morsukkami, morsoriarmat aappara oqaluullugu ”qivi kanna”, taava isigillualerakku pueqqikkami, tamakku tikaagulliusaat soorlu maaniittartut taamaattumiik takissusaa qanorinnerunerpa puingami.

Soorlu umiatsiarluni nalaarniaraanni kummibåde-kkunnut ulorianangajassasoq aamma.

Jens Frederiksenip aavaqataatalu Silas Jeremiassenip, uumasoq nalunaaquttap akunnerata ataatsip missaanni puisaqattaartoq, tatsip nuunnguata ilaannut tarrinnissaata tungaanut isiginnaarpaat. Ungasiarmallu suussusersisinnaasimanngilaat.

- Puigaangami soorlu tikaagulliusaamut eqqaanartarpoq, niaqua kisianni takunnginnatsingu, aamma ungasikkami qaqqap qaaniit kisianni erseqqarilluni, sarpiinik aamma takunngilagut. Kingornatungaa kingulliulluni tarrittaraluarpoq, iluamik takuneq ajoratsigu, taanna kingornatungeqarfia kisiat timitaa tamaat isigigatsikku niaquanik takunngiinnarluta.Taamak oqarpoq Jens Frederiksen.

Pinngortitaleriffimmi miluumasut timmissallu immikkoortortaqarfiani pisortaq, Fernando Ugarte, oqarpoq arferit kuup itinera naammagigaangamikku taserniissinnaasarnerat takornartaanngitsoq.

- Arferit taserni tarajoqanngitsuniittarnerat takornartaanngilaq, uanili taseq sissamiit 10 kilometerit missaanni ungasitsigimmat, kuullu umiatsiarfiginissaa ikkappallaarmat arfiunissaa qularnarluinnarpoq. Nunallu iluatigulluunniit aqquteqarsimagaluarpat arfeq 10 kilometerit anersaarnani aqqaamasinnaanngivippoq. Tulliatut eqqoriarsinnaasara tassatuaavoq qasigiaq, kisiat qasigiaq aamma tikagulliusaatut angitigilersinnaanngilaq, Fernado Ugarte oqarpoq.