Tatiginninnginnermik oqaaseqaat taasissutigineqartoq
Tatiginninnginnermik oqaaseqaat pissuteqarpoq, Peqqinnissaqarfik siorna 2011-imi aningaasanik 14 million koruuninik atuivallaarsimanera.Taama allaaserisaqarpoq Sermitsiaq.ag.
Nunatsinni Peqqinnissaqarfik ukiumut 1,2 milliard koruuninik aningaasaliiffigineqartarpoq.
Aningaasanik atuivallaarsimaneq kukkunersiuinermut ataatsimiititaliamit isornartorsiorneqareersorlu, Peqqissutsimut Naalakkersuisoq, Agathe Fontain nassuiaavoq, atuivallaarsimanermut ilaatigut pissutaasoq, Peqqinnissaqarfimmi aqutsisuusimasunik ajornartorsiuteqartoqarsimanera.
Inuilli ajornartorsiutaasimanerannik oqalunneq, Inatsisartuni ilaasortap Siumumeersup, Kristian Jeremiassenip naammaginagu oqaatigaa, Agathe Fontain-ilu pisumut akisussaasuunerarlugu oqarluni.
Aningaasanik atuivallaarsimaneq Inatsisartuni ippassaq oqallisaagaatsiareersorlu, Atassummit, Knud Kristiansenimit Peqqissutsimut Naalakkersuisoq tatiginninnginnermik oqaaseqaateqarfigaa.
Demokraatineersup Justus Hansenip atuivallaarsimaneq isornartorsioraluarlugu, tatiginninnginnermik oqaaseqaat pinngitsoortippaa, isornartorsiulli tusaatissatut tigullugu. Justus Hansenip aamma oqaatigaa, ilisimallugu Agathe Fontainip atuivallaarsimaneq paasimmagu, tamanna erngerluni akuleruffigisimagaluaraa.
Justus Hansenillu ilanngullugu oqaatigaa, Peqqinnissaqarfimmut aningaasaliissutit tamaasa ataatsimut isigalugit 1 procentimik, ukiunut siuliinut naleqqiullugu atuivallaarsimaneq suunngitsuusoq.
Tatiginninnginnermik oqaaseqaat taasissutigitinneqarmat Inatsisartut amerlanerussuteqartut tamanna itigartippaat, tamatumalu kingorna Peqqinnissaqarfiup naatsorsuutai 2011-meersut akuersissutigineqarlutik.
