Inatsisartut upernaakkut ataatsimiinnerata ullumikkut ammarneqarnerani pissanganartorsiornartumik nalinginnaanngitsumillu pisoqarpoq, illuatungiliuttut Demokraatit ataatsimiinneq aallartiinnartoq naalakkersuisunut ilaasortamut Tommy Marø-mut tatiginninnginnermik saqqummiussimmata. Kisianni tamanna naalakkersuisoqatigiinnit unillatsiarnerup kingorna pinngitsoortinneqarpoq:
-Uagut malersuinitsinni pisumik salluliornermik aallaavigigatsigu naalakkersuisutut sulinermi inatsisit. Tassanimi allassimavoq paragraf 36 imm. 1 atorlugu paasussutissanik piniarutta taava paasissutissat tamakkiisut, tassa toqqortuineqanngitsumik aammalu sallunertaqanngitsumik uatsinnut saqqummiunneqassasut. Per Berthelsen, Demokraatit siulittaasuat oqarpoq, nangillunilu.
-Uani malersugarput tassaavoq Tommy Marøp nassuiaammi oqarnera nammineerluni politiinut saaffiginnissimamani angerlaateqqunissaq siunertaralugu. Naalakkersuisulli siulittaasuat nalunaaruteqarpoq, Tommy Marø politiiniissimasoq angerlaanneqarnissani ujartorlugu. Taava kingusinnerusukkut Demokraatinit apeqquteqaratta Naalakkersuisut siulittaasuat oqarpoq sallunngilluinnarluni pisarluni. Taanna tusaatissatut tiguarput. Kisianni Tommy Marø sallusimavoq, naallu Lars-Emil Johansenimit illersorneqaraluarluni, inuiaqatigiinnut oqartoqarsinnaanngorpoq: Salluinnartoruna, ajunngilaq.
- Ajoraluartumik maannamut inatsisinut atatillugu ileqqorissaarnermik amigartorujussuarmik takutitsisarneq takoreerparput. Ullumikkullu uppernarsivarput. Per Berthelsen nangippoq.
- Naalakkersuisooqatigiit tungaanninngaanniit naak ataasiinnaq, tassalu Siumut erseqqissumik akigaluartoq ajuusaarnaraluartumik takutinneqarpoq inatsisit maleqqissaarlugit ingerlanissaq soqutigineqanngitsoq. Tassa sulinissatsinnut taanna tunngaviulerpoq. Uagulli Demokraatit taamaaliornavianngilagut, inatsisit pingaartillugu ingerlatissavagut. Demokraatit siulittaasuat Per Berthelsen oqarpoq.
- Qularnanngilaq arlallit naalakkersuisunut ilaasortap julefrokostereerluni politiinut pulaarsimanera angerlaateqqusimaneralu tusakatalersimassagaat. Kisianni pisimasup kinguneri, tassa Tommy Marø-p nassuiaatai Demokraatit tatiginnikkunnaarnermik oqaluuserititseriaraluarnerannut patsisaapput. Partit naalakkersuisooqatigiit pingasuusut oqaluuserisassamik pinngitsoortitsinerisigut naalakkersuisuni ilaasortat allanngortinneqanngillat.
Radioaviisimit aammattaaq naalakkersuisunut ilaasortaq Tommy Marø oqaloqatigerusussimagaluarparput, ilaatigut piffissap ilaani tunuarnissaminik eqqarsaateqarsimanersoq paaserusullugu. Kisianni Tommy Marøp apersorneqarnissani itigartitsissutigaa.
