Tassaarsuarmit eqqugaasut inissianut nutaanut siulliit nutsertut

Nunaqarfiit tassaarsuarmit eqqugaaneranit ukiut marluk qaangiutillartullu eqqugaasimasut inissiami taartissaannut nutsertussat siulliit nutserput.

Nunaqarfinni innuttaasut Karrat Kangerluani 2017-imi tassaarsuaqarnerani angerlarsimaffeeruttut inissianut taartissanut sanaartorneqartunut nutsertussat siulliit ullumi nutsersinnaapput.

Inissiat marluk piareerput, 38-t kingulliit aggustip qaammataani ukiarulu piariissapput.

Avannaata Kommuniani borgmesterip, Palle Jeremiassen siulliit nutsersinnaalernerat nuannaarutigaa:

Namminersorlutik Oqartussat Avannaata Kommuniani ukunani illuliorput: 

- Uummannami illut 31-t.
- Ukkusissani illut pingasut.
- Saattuni illut marluk.
- Ikerasammi illut sisamat.
- Katillugit illut 40-t sananeqarput. 

- Nuannaartorujussuuvunga massakkut tassunga killikkatta. Suliaq sivisusimaqaaq aammalu eqqorneqartunut assut oqimaassimalluni aamma pisortanut suliaq annertusimalluni takillunilu.

Upernaaq naammassisussaagaluartut

Inissiat upernaaq piareereertussaagaluarput, inissialiornerli februaarimi ukiup affaanik kinguartinneqarpoq. Palle Jeremiassenip innuttaasut ukiuni marlunni iluamik angerlarsimaffeqanngitsut qanoq nalaataqarsimanerat aatsaat paasisinnaalerpaa.

AAMMA ATUARUK Tassaarsuaqarnerani eqqugaasunut inissiat taartissat kinguaattoorutigineqartut

- Taamaattumik quttateqaakka massakkut nutserlutik aallartissinnaalersut. Taavalu inuunerminnik namminneq illuminni inuunertik nalinginnaasoq ingerlateqqissinnaalissagamikku, assut nuannaarpunga aamma quttallugit annertuumik, Palle Jeremiassen oqarpoq.

Illut nutaat ilaat iserterfigineqarnissamut piareertoq. Assi: Avannaata Kommunia Illut nutaat ilaat iserterfigineqarnissamut piareertoq. Assi: Avannaata Kommunia

Karrat Kangerluani nunaqarfiit arlallit juunip 17-iat, 2017-imi tassaarsuarfigiterujussuarput. Nuugaatsiaq Illorsuillu sakkortunerusumik eqqugaapput. Inuit sisamat ajunaarput 174-illu angerlarsimaffeerullutik.

Innuttaasut eqqorneqartut 174-iusut tassaapput ilaqutariit 33-t, oqartussallu nunaqarfiit qimanneqarnissaannik oqaaseqarneratigut taakku tassanngaannartumik angerlarsimaffeerupput.

Taamaammat inissiat ilaqutariippassuit angerlaqqissinnaajunnaartut angerlarsimaffiannut taartissat sananeqarnissaat Namminersorlutik Oqartussanit aallartinneqarput.

Aggustimi isertissasut

Ilaqutariit sumi najugaqarusunnerlutik namminneq aalajangigarigaat, tamannalu malillugu Namminersorlutik Oqartussat inissialiortut, borgmesterip, Palle Jeremiassenip oqaatigaa. Nuuttussat tullii 2019-ip ingerlanerani nutsissapput.

- Siulliit aqagu Saattuni illuni marlunni nutsertut siulliit aqagu inissinneqassapput, taava tullii Uummannami aggustip aallartilaarnerani nutsersinnaalissapput, taavalu tulleriiaarlutik ukiariartornerani isertertaqattaalertussaapput, taannalu ukiariartornerani, ukiup naajartulernerani ingerlasussaassalluni, Palle Jeremiassen oqarpoq.

Inissialiornissamut pilersaarut tamarmi katillugu Namminersorlutik Oqartussanut 110 millionit koruuninik aningaasartuutaavoq, inissiallu taakku maanna Avannaata Kommunianut siunissami attartortitsisalertussamut tunniunneqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat