Tassaarsuaqarneranik eqqugaasunut tunissuterpassuit
Karrat kangerluani juunip qaammataani tassaarsuaqarneranit qaammatit marluk qaangiutilernerini, suliniaqatigiiffiit peqatigiiffiillu katersuiniarnermi angusanik kusanartunik saqqummiussaqarput.
Dansk Røde Korsip eqqugaasunut ikiuiniarluni katersuiniarneq juunip 20-ani aallartippaa, maannamullu katillugit 1 million koruunit sinnilaarlugit katersorneqarsimasut, suliniaqatigiiffik KNR-imut taama ilisimatitsivoq.
AAMMA ATUARUK Naalakkersuisut innuttaasunik inisseeqqinnissamut 70 millionit aningaasaliissutigigaat
Danmarkimi innuttaasunit 600.000 koruunit tunissutigineqarsimapput, Kunngikkormiut 200.000 koruuninik, LEGO-millu tunngaviliisup aningaasaateqarfia, Ole Kirks Fond, Dansk Røde Korsimut 250.000 koruuninik tunissuteqarluni.
Dansk Røde Korsip ajunaarnersuaqarnermi suliniutinut pisortaa Bjarke Skaaning naapertorlugu, aningaasat katersorneqartut ajunaarnersuaqarnerata annertussusianut "naleqqupput".
- Aningaasat katersorneqartut amerlassusaat pitsaasuusoraakka. Aamma isumaqarpunga ajunaarnersuaqarneranut atatillugu pisariaqartinneqalersut aningaasat uagut suliniaqatigiiffillu allat katersorsinnaasimasagut atorlugit matussuserneqarsinnaassasut, KNR-imut taama oqarpoq.
Assersuutitullu Sudanimi ungasinngitsukkut tassaarsuaqarneranut inuit 4000-it angerlarsimaffeeruffigisaannut Dansk Røde Kors immikkut katersuiniarnermik aallartitsisimanngitsoq oqaatigaa. Suliniaqatigiiffiup siunertamut taassumunnga danskinit aningaasanik katersuiniartoqarsinnaanissaa naatsorsuutiginngikkaa, Bjarke Skaaning taama oqarpoq.
Tassaarsuaqarneranik eqqugaasunut katersuiniarnerit allat
Nuummi Katuami katersuiniarluni aaqqissuussinermi 90.000 koruunit katersorneqarput.
Tele-Postip SMS atorlugu katersuiniarnerani 40.000 koruunit katersorneqarput Tele-Postilu nammineq aamma 40.000 koruuninik tunissuteqarluni.
Islandimi Kirkenes Nødhjælp islandimiut aningaasaataannik 5 millionit koruuninik tunissuteqarpoq, tassalu 317.000 koruunit.
Naalakkersuisut aamma nalunaarutigaat nunaqarfinni eqqugaasuni innuttaasunik inisseeqqinnissaq pisortat isumaginiaraat, tamatamunngalu 70 millionit koruunit immikkoortinneqartut.
Aningaasat ingerlaannaq atorneqalersut
Dansk Røde Korsip katersuiniarnerani aningaasat tunissutigineqartut amerlanersaat ajunaarnersuup pinerata kingorna sapaatit akunnerat qaangiuttoq tunissutigineqarsimapput, taakkulu tamaasa Kalaallit Røde Korsiannut Uummannami ikiuiniarnermut aqutsisumut tunniunneqarput.
Danmarkimi katersorneqartut ilarpassui, katillugit 1.050.000 koruunit, nunaqarfimmiut eqqugaasut piniutissaannik pisiortornermut atorneqassapput.
Aningaasat tamatuma saniatigut aamma Uummannami sullissivimmik pilersitsinermut ingerlatsinermullu atorneqassapput, Røde Korsilu innuttaasunut eqqugaasunut misigissutsikkut inooqataanikkullu sammisaqartitsinernik aamma neqerooruteqarsimalluni.
AAMMA ATUARUK Aalisartut piniartullu annaasamminnik taarsiiffigitissapput
Ajunaarnersuaqarnerata kinguninngua Grønlandsbanken aamma katersuiniarnermut kontumik pilersitsivoq, aningaasallu katersorneqartut 1,6 millionit koruuniusut Kalaallit Røde Korsiannut juulimi tunniunneqarput.
Dansk Røde Kors aamma Grønlandsbanken naapertorlugit, katersuiniarnermut kontut suli ammatinneqarput sulilu tunissuteqartoqarsinnaavoq.
Peqatigiiffik nutaaq eqqugaasunik ikiuiniartoq
Danmarkimi peqatigiiffimmik nutaamik pilersitsisoqarpoq, peqatigiiffiullu siunertatuaraa tassaarsuaqarnerani eqqugaasunik ikiuinissaq.
Peqatigiiffik Fællesskab Forpligter (Ataatsimoornerput Pisussaaffiliivoq, aaqq.) Danmarkimi innuttaasunit nunatsinnut attuumassuteqartunit pilersinneqarpoq. Peqatigiiffimmik pilersitsisut Avannaani ajunaarnersuaqarnerata Danmarkimi tusagassiuutinit sammineqarpiannginnera pakatsissutigisimagaat, Fællesskab Forpligterimi siulittaasoq, Torben Ørting Jørgensen, taama oqarpoq.
- Kalaallit Nunaanni pisup taama sakkortutigisup allannguutaatigisullu taama killeqartigisumik Danmarkimi sammineqarnerata pakatsissutiginera ataatsimoorutigaarput (…). Taamatullu pisoqarnera akuerisinnaanngilluinnarpara (..). Innuttaaqatitsinnut kunngeqarfimmi sumiikkaluartunut immikkut ittumik pisussaaffeqarluta misigisimavugut. Tamannalu tapersiissuteqarluta soorunami takutikkusupparput.
AAMMA ATUARUK Indsatshold henter personlige ejendele i Nuugaatsiaq
Peqatigiiffiup inuinnarnit tunissutigineqartunit 175.000 koruunit maannamut katersorsimavai. Peqatigiiffillu Qaasuitsup Kommunia suleqatigalugu nunaqarfinni eqqugaasuni innuttaasut tuttunniarnermut maanna ingerlanneqartumut peqataasinnaanissaat anguniarlugu aallaasinik VHF-radiunillu tunissuteqareersimavoq.
Peqatigiiffik ilaatigut inuit attaveqaqatigiittarfiisigut ukioq ataaseq katersuiniarnissamut akuerineqarsimavoq, piffissamilu tassani 5 millionit koruunit anguneqarnissaat neriuutigineqarpoq. Aningaasallu taakku Namminersorlutik Oqartussat suleqatigalugit ilaatigut illuliortiternermut atorneqassapput.
Tamatuma saniatigut Fællesskab Forpligter tassaarsuaqarneranik eqqugaasunut tapersersuilluni videomik aamma saqqummersitsisimavoq.
