Saqqaq Tassaarsuaqalissagaluarpat tankersuit eqqorneqarsinnaasut
Mianersoqqussutigineqartut ilaaniipput tankersuit Nukissiorfinnit aamma Pilersuisumit pigineqartut.
Saqqaq tassaarsuarmit anguneqarluni eqqorneqassagaluarpat ajunaarnersuaqarnissaanut suleriusissanut pilersaarut Avannaata Kommunianit suliarineqaleruttorpoq.
Saqqamimi illorsuit atortullu - amerlanerit najugaqarfigineqanngitsut - maanna misissorneqaleruttorput.
Taakkualu ilagaat tankersuit sissami inissisimasut. Pilersuisulli tankiutai nunamut aalajangerluarneqarsimasut maanna qularnaarneqarsimalerpoq.
- Maliup sakkortoorujussuarmik nikisinngippagit imannak amoriaannaasutut naatsorsuussaanngillat. Isumannaallisaaneq malillugu taakkua aalajangigaapput, Ilulissani qatserisartut pisortaat Jakob Lundblad oqarpoq.
AAMMA ATUARUK Qaqqanit sisoortoqarsinnaanera aarlerinaateqartoq uippallernanngilarli
Saqqamili Nukissiorfiup tankii nunamut aalajangersorneqarsimanngillat.
- Nukissiorfiup tankiutai nunamut aalajangigaanngillat. Taava ataatsimeeqatigisussaavagut Nukissiorfimminngaanniit sulisut.
Ilulissani Qatserisartut Nukissiorfinnik ataasinngorpat ataatsimeeqatigineqassapput.
- Taava tassani sukumiinerusumik eqqartussuvagut nunamut piaartumik aalajangissagaat, Jakob Lundblad oqarpoq.
Aammali Saqqami Nukissiorfiup innaallagissamik pilersuineranut atortut tassaarsuaqaraluarpat anguneqaratarsinnaasunut ilaapput.
- Suu, taakkua sualummik nunaqarfiup tungaanoortut pilersaarusianut ilaasussaapput nuunneqarsinnaaneri. Tiffarlugit. Malerujussuarnik angusinnaajunnaartillugit. Tamakkununnga allaat pilersaarusiortussaavagut ataatsimeeqatigileriarutsigit Nukissiorfimmi sulisut.
Saqqami kalerrisaarut nilliasaat sissamit qummut tiffarlugu sapaatip akunnerata tulliani nuunneqarniartoq Ilulissani Qatserisartunit ilanngullugu ilisimatitsissutigineqarpoq.