Tasiusami orsussaasivik 100 literimik immerneqarpallaartoq

Nanortallip nunaqarfiani orsussaaviup eqqaani benzinamik aniatitsisoqarpoq, oqartussallu sapinngisaminnik katersuipput.

Umiarsuaq orsussamik assartuut Nanortallip eqqaanut Tasiusamut benzinamik immiiartorluni tallimanngormat aqqusaarpoq.

Orsussamilli assartuummit orsussaasivimmut 100 literinik immiivallaartoqarmat benziina sumiiffimmut kuutsinneqarpoq. Tamanna nunaqarfimmiut tallimanngornermi arfininngornermilu benzinarsunnimik naamasaqarsinnaaneranik kinguneqarpoq.

Polaroil tusagassiuutinut nalunaarummi allappoq.

- Kuutsitsisoqarnerata aqaguani suli benzinarsunnippoq, tamatumalu saniatigut orsussaasiviup eqqaani immap qaani orsussaqartoq paasineqarluni.

- Orsussaasivik erngertumik itissusersiorneqarpoq, tassanilu ammaneqartoq paasineqarpoq, tamanna piffissami matumani orsussaasiviup ippassaammat immerpallaarneranit naqitsinerminngaanneersimassangatinneqarpoq.

Polaroilip pisortaata, Githa Brask Olsenip oqarnera naapertorlugu suliffeqarfiup benzinamik aniatitsisoqarneranut upalungaarsimanermut pilersaarutini malippaa.

- Pisup paasineqarnerani oqartussat attuumassuteqartut, sulisut kiisalu umiarsuit sineriammi orsiisuni inuttat Polaroilip upalungaarsimanermik pilersaarutaanut atatillugu ilisimatinneqarput.

- Qatserisartut, KNI-mi sulisut kiisalu umiarsuarmi sineriammi orsiisartumi sulisut orsiivimmik imaarsiarlutik anititsinermillu killiliiniarlutik ilaatigut sapusiamillu puttasuliillutik erngertumik aallartipput. Tamatuma saniatigut orsussaq sapinngasaq tamaat atorlugu katersorneqarpoq.

Namminersorlutik Oqartussat orsussamik aniatitsineq killilerniarlugu atortussanik piareersimatitsisimasut, avatangiisinut naalakkersuisoqarfiup paasissutissiissutigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl