Tasiusami inuusuttut Pilersuisumut 200.000 koruuninik tillinniarput

Tasiusami Pilersuisumi aningaasanik 200.000 koruuninik pingasunngormat ullaakkut amigaateqartoqarpoq. Pilersuisumilu tillinniartoqarsimanera pillugu Upernavimmi Politiinut ullaakkut arfineq pingasunngulersoq nalunaarfigitipput. Aningaasat tillinniarneqartut amerlassusaat eqqarsaatigalugit suliaq Upernavimmi politiinit misissorneqartussatut nalilerneqarpoq.

- Politiit Upernavimmi angallateqanngillat, taamaammat periarfissaq siulleq atorlugu umiatsiamik attartornikkut politiit marluk Tasiusamukartinneqarput, Upernavimmi politiit pisortarigallagaat Kasper Berthelsen nassuiaavoq.

- Politiit marluk Tasiusamut tikiinnartut, inuusuttut ilaasa pissusilersuutaa anaanaasup ippigilerpaa, taamaasillunilu ataaseq anaanaminut tillinniarneq pillugu nassuerpoq, Kasper Berthelsen oqarpoq. Tillinniarsimasullu pingasut unnukkut arfineq pingasut missaani paasineqarput, taakkualu suliamut tunngasunik apersorneqarnerminnut atatillugu ingerlaannaq aamma nassuerlutik.

- Suliap annertussusaa eqqarsaatigalugu inuusuttut tigummigallagaanissaanut tunngavissaqaraluarpoq, kisianni tillinniarnermut tunngatillugu inuusuttut nassuerput taamaammallu iperagaagallarlutik, Kasper Berthelsen nassuiaavoq. Arnat inuusuttut marluk 17-inik ukiullit kiisalu angut 18-inik ukiulik kingusinnerusukkut eqqartuussivilersuunneqassapput.

Aningaasat tillinneqartut 200.000 koruunit ilanngarneqarpianngitsut nassaarineqarput, aningaasallu toqqorternagit tigummineqaannarsimagaluarlutik.