Tasiilarmiuaqqat Amalienborgimut pulaassapput
Meeqqat 35-t Tasiilameersut inuunerminni puigassarinngisaminnik ullumi misigisaqartussanngorput.Tassami taakku Tasiilap illoqarfittut ikinngutaani Gentoftemi paarlaasseqatigiillutik sapaatip akunnerini sisamani tikeraanertik naggaserlugu, prinsesse Benediktep mamakujullerlunilu sodavanillernissaanut Amalienborgimullu takornariarnissaminnut qaaqquneqarput.
Allattoq Gedion Storch
Meeqqat Danmarkimeereeraangata kunngikkormiunit ilassineqarnissaat, Benediktemillu oqaloqateqarnissamik aaqqissuussisarneq Amalienborgimi ukiorpaalunni aalajangersimasumik ileqquulersimavoq.
Meeqqat 35-t taakkunannga, pingasut qallunaatorsinnaareersut, sapaatit akunnerini sisamani Danmarkimiinnerminni sukumiisumik qallunaatut ilinniartinneqartut, Atuagagdliutini allaaserineqarpoq.
Sunngiffitsik ilaatigut Gentoftemi nalukkiakulaarnermik, katersugaasivinnik takuniaanernut Københavnimilu pisuttuarnernut atorneqartarsimavoq. Nalunaaquttallumi akunnialunngui qaangiuppata meeqqanut angalaarnermi alutornarnerpaaq takuniarneqassaaq - tassalu Amalienborgimut pulaarneq.